Нунын подвигыштым историйыш пуртымо

1945 ийысе сеҥымаш май утыр-утыр шеҥгелан кодеш. Туге гынат калык нунын патырлыкыштым, лўддымылыкыштым, ту ныллымше ийласе неле сар нерген шарнен ила. Тудо – ту шучко сар ветеран-влакын шўм-чоныштышт. Мыняр еҥын йоча годсо жапше сар гоч эртен. Кугу Ачамланде сарыште лийше событий-влак историйнан лаштыклаштыже гына кодышт.

Кугу Ачамланде сарыште 8 тўжем наре калтасамыт, кидешышт сӧйкуралым кучен, Шочмо элнам тушман деч араленыт. Шучко кредалмаш пасулаште ныл тўжем утла мемнан кундемнан шочшыжо – рядовой ден офицер-влак – вуйыштым пыштеныт да увер деч посна йомыныт. Кугу подвигым ыштышыштла нуно Москва ден Ленинград ола-влакым араленыт, Сталинград да Курск дугаште герой семын кучедалыныт, немыч кид йымачын Украинын, Белоруссийын олаже ден селалажым, Прибалтикысе республике-влакым, тыгак Эрвел Европын эллажым утареныт да Берлин марте шуыныт.

Сар гыч илыше, шукыжо сусыргышо да инвалид лийын пӧртылыныт.

Мемнан ныл землякналан Совет Ушемын Геройжо лўмым пуэныт: Дмитрий Лазаревлан, Тимирай Кубакаевлан, Василий Васильевлан да Петр Сюткинлан. Шукыжо III да II степенян Чап, Йошкар Знамя, Йошкар Шўдыр, Ачамланде сарын орденже-влак да «За отвагу» медаль дене палемдалтыныт.

Сеҥыше-влак тукым… Ий гыч ийыш Кугу Ачамланде сарын участникше-влак шагалемыт. Таче мемнан районышто Кугу Ачамланде сарын 11 участникше, тылыште тыршыше 186 еҥ, сарыште колышо салтак-влакын 83 тулык ватышт илат.

Фотосўретыште: Кугу Ачамланде сарын ветеранже-влак Исекеев Алексей Семенович, Лагунов Дмитрий Игнатьевич, Зайдуллин Гарифулла Зайдуллович, Хафизов Хамис Харисович, Ахметшин Алексей Изергинович (2014 ийысе май).