Тургым жапыште – тыршыман

Ялыште кызыт тургым жап. Чыла вере шошо ага кая. Шошым кузе пашам ыштет, шыжым тугай лектышым налат. Садлан ял калык каныде, нойымым шотыш налде тырша. Пырче сай да вўдыжгӧ мландыш вочшо манын, пашам жапыштыже шукташ кўлеш.

«Победа» ООО-н Кугу Качакысе производственный участкыштыже тиде кечылаште чыланат пасушто тыршеныт: тырмаленыт, ўденыт. Тиде чумыр пашашке шке вийыштым тыгак зернотокын машинистше Виктор Уракбаев ден механизатор Юрий Шакирзянов пыштеныт.

Шоналташ гын зернотокын машинистше пасу пашаште мом вара ыштен кертеш? Тудо нӧшмым ўдашлан ямдыла улмаш. Мемнан мийымына годым Виктор Уракбаев шке звеножо дене озанлыкыште нӧшмым чер да осал копшаҥге-влак деч ядохимикат дене протравитла ыле. Тиде моткоч кўлешан мероприятий. Чыла тиде пашам шуктымеке, сай лектышым налашлан ўшан уло. Протравитель агрегат, ядохимикат дене пашам ышташлан сай шинчымаш да моштымаш кўлыт. Виктор Уракбаевын тиде пашаште опытшо кугу. Зернотокын машинистше лийын тудо чарныде 34 ий ышта. Эше 1985 ийыште «Красная звезда» колхозыштак тўҥалын. Вара – «Кизили», ынде теве – «Победа». Тыгак Уракбаевын «озанлыкыштыже» протравтитель деч посна «ЗАВ-10» пырчым эрыктыше агрегат ден погрузчик уло. Нуно у огытыл, эше колхоз деч вара кодшо-влак, но кызыт мартеат ўшанлын пашам ыштат. Чылажат, конешне, Виктор Уракбаевын тыршымыжлан кӧра. Шке пашажым сай палыше специалист семын тудлан ўшанен пуымо техникым сайын онча, жапыштыже олмыкта, техончымашым эрта.

Озанлыкыште налме чыла пырче лектыш шыжым Виктор Уракбаевын кидше гоч эрта. Тудо пырчым сортироватла, протравитла.

Уракбаевым пашаче коллективыштат, ял калыкат пагала. Тудо пашам гына огыл тыршен ышта, тыгак моткоч сай еш оза, шуко икшыван ача улеш. Елена ватыж дене кум икшывым – Гузель ден Юлия ўдыр-влакым да Валерий эргым – ончен куштеныт. Кок ўдыржат шке ешышт дене илат, иктыже – Нижневартовскышто, весыже – Ижевскыште. Уракбаевмытын кум уныкашт кугемыт. Валерий Нефтекамск оласе машиностроительный колледжыште автомеханиклан тунемеш.

Елена ватыже Виктор семынак пашам йӧратышан ўдырамаш улеш. «Победа» ООО-то ушкалым лўшта. Икшыве-влакым кушташ, озанлыкым кучаш – паша деч посна нигузе ок лий.

Юрий Шакирзяновын механизатор специальностьшо деч посна эше электрогазосварщик специальностьшо уло. Лач пытартыш специальность дене тудо Нефтекамск оласе ик предприятийыште, тыгак Пермь кундемыште вахте йӧн дене пашам ыштен.

- Паша келшен, но чўчкыдын еш деч тораште лияш сай огыл, – каласкала Юрий. – Кунам «Победа» ООО мемнан панкрутыш лекше колхоз олмеш пашам ышташ тўҥалын, мый пашам верымат да пашамат вашталташ лийым. Тидлан ик пырчат ом ӧкынӧ. Ялыште кушшо еҥлан паша палыме, пашадарат сай, а эн тўҥжӧ – пӧртыштӧ тыйым эре вате ден икшыве-шамыч вучат.

Юрий Шакирзянов Кургак ялыште ила. Светлана ватыже верысе кевытыште пашам ышта. Нуно кок ўдырым – Ксения ден Камилам – ончен куштат. Кугырак ўдырышт икымше классым тунем лектеш, изижлан – ныл ий. Шке озанлыкышт уло: пакча, ушкал, сӧсна, шорык, чыве, комбо. Икманаш, йывыртен да пашам тыршен ыштен илаш чыла уло. Очыни, тыгак лийшаш.

Ю. Шамсутдинов.