Ӱмыр йолташ лийын 50 ий пырля илат

Мыйын ачам ден авамын 11 майыште юбилейышт – шӧртньӧ сӱаныш ыле. Галина Кугубаевна ден Андрей Павлович Ильбахтинмыт куан ден ойгым лош пайлен тура илыш корно дене эртеныт. Таче нуно куптыргылшо шӱргывылышан, чалемше ӱпан улыт гынат, икте-весышт ӱмбак ончычсо семынак ныжылгын ончат, келшен илат.

Нуным пӱрымаш шукертак ушен. Пырля Шоръялыште кушкыныт, ик школыш тунемаш коштыныт, ик парт коклаште шинченыт. Тунамак нуным ӱдыр дне эрге-влак шаярен «жених ден невеста» манын ойленыт. Ий-влак эртеныт, а 19 ияш улмышт годым нуно мужырыштым пеҥгыдемдаш лийыныт. Авам 16 ияш фермыште ушкалым лӱшташ тӱҥалын, а ачам озанлыкыште тракторист лийын тыршен. Нуно коктынат тыршен пашам ыштеныт, кӱкшын акленыт да пагаленыт.

Кид кучалын, икте-весылан полшен да эҥертен илыш корно дене ачам ден авам ошкылыныт. Пырля шукым чытеныт да сеҥеныт. А эн тӱҥжӧ – вич икшывым: 4 эрге ден ӱдырым шочыктеныт да ончен куштеныт. Ындыжым нуным 10 чапле уныка куандарат. Мемнан ача-авана деч кугу поянлыкым – илышым налынна. Нуно мемнам йӧратымаште куштеныт. Кузе нуно чылашкыжат етшеныт манын кызыт ӧрам. ™стелыште кеч-кунамат шокшо кочкыш, ару вургем, уна-влакым порын да чӱчкыдын вашлийыныт. Таче ме, икшыве-влак, шкежат кугемынна, ешаҥынна. А мемнан пелен ача-ава улмылан моткоч куанен илена.

Кузе ме нуным моткоч чот йӧратымына нерген ойлаш, мемнам ончен куштымыштлан таум каласаш мондена. Тау, ачай ден авай, мемнам ончен куштымыланда, йол ӱмбаке пеҥгыдын шогалтымыланда, йӧратымыланда. Меат тендам моткоч йӧратена, таза, кужу ӱмыран, илышлан куанен илыза.

Чыла икшывыда лӱм дене Елена ӱдырда.