Район газет деч посна ик кечат огыт иле

Мемнан районнан ик эн сылне вер-шӧрыштыжӧ, Султанай ялыште, теве ынде чырык курым ик чапле еш келшен ила. Тиде Зуфар Шайхинурович ден Назиба Галиевна Шайхинуровмыт.

Назиба Галиевна ӱмыржӧ мучко кушкын толшо тукымым туныктен, сулен налме канышыш лекмыж марте Калмиямучаш кыдалаш школышто завуч лийын пашам ыштен, немыч да руш йылме-влакым туныктен, руш литературын поро йӱлаштыже икшыве-влакым воспитатлен. Школын выпускникше-влак тудым эн поро мут дене гына шарналтен ойлат. Тыглай ялысе ӱдыр элнан нӧлталалтме неле ийлаштыже кӱшыл образованийым налын кертын, ялласе икшыве-влаклан шинчымашым пуаш кӱлмӧ нерген пеш сай пален. Сандене тудын тунемшыже-влак обществын сай гражданинже лийже манын, шкеж деч шогышыжым чылажымат ышташ тыршен.

Тудын пелашыже Зуфар Шайхинурович ӱмыржӧ мучко ялозанлыкыште пашам ыштен. Кужу жап тӱҥ бухгалтер, вара колхозник-влак чумыр погынымаште тудым «Советская Армия» озанлыкын вуйлатышыжлан сайленыт. Кугурак тукым еҥ-влак тудын лӱмжым поро мут дене пагален шарналтен ойлат. А южиктышт тыге ойлат: – Эх, Зуфар Шайхинурович лиеш ыле гын, озанлык ок шалане ыле.

Зуфар Шайхинурович озанлык пашам пеҥгыдын виктарыше еҥ лийын. Тӱҥ бухгалтер лийын пашам ыштымыж годым озанлыкын кажне теҥгежым, кажне ыржым аныклен кодаш тыршен. Нуным вуйлатышыже-влакланат кучылтын пыштараш пуэн огыл. А пытартышышт чӱчкыдын вашталтыныт.

А озанлыкым шке вуйлаташ тӱҥалме дене колхозник-влак сай илышт манын тыршен. Шкаланже кугу, мотор пӧртым чоҥен огыл, а колхозник-влаклан полшен. Транспортым, чоҥымо материал-влакым ойырен. Тудын озанлыкым вуйлатыме ий-влак эн неле лийыныт. Элыште перестройко, пуламыж жап, приватизаций… Кремль гыч элнан ик эн тӱҥ озаже тыге ойлен: Чыла арален кодаш тыршыза. Кеч-могай неле ситуаций гыч йӧным муын моштен.

Кунам озанлык оксадыме жап дене вашлиялтын, а кугыжаныш шурным пеҥгыде ак дене налмыжым чарнен, Зуфар Шайхинурович шке озанлыкыштыже кушкыл ӱйым ыштен лукмо пашам организоватлен. Тудым ужален да ты окса дене колхозник-влаклан пашадарым тӱлен. Ончычсо пашаеҥ-влак тудым тыгайым шарнат.

Кызыт вате-марий Шайхутдиновмыт сулен налме канышыште улыт. Туге гынат нуно районын илышыж нерген лудаш йӧратат. А чыла тидым район газетыште лудыт. Сандене тудым почтальонын кондымыжым чытыдымын вучат. Район газетыште шагал лаштыш улмылан чамана.

Ты йодыш шотышто Зуфар Шайхинурович Путинлан район газетлан кугыданыш полышым ончыктыжо манын серышым возынеже. Совет власть пеленсе жапысе гай. Тунам район газет арнялан кок гана огыл, а кум гана лектын. Да 12 лаштык дене. А вет Россий мучко мыняр тыгай изи ял уло, нуно район газетла гоч гына чыла уверым пален налын кертыт. Тыште чыла илыш да эртыше самырык годсо жап.

В. Акиев.