«Кокымшо ава» да йолташ

Эше шукерте огыл мемнан йочана-влаклан икымше оҥгыр йӱк йоҥгалтын – нуно икымше классыш тунемаш каеныт. Палыдыме обстановко, у тӱс да шуко молат нунын тӱрлӧ эмоцийыштым шочыктен. Кӧ дыр куанен, кӧ дыр лӱдын… Чыла тидым сеҥаш нунылан икымше туныктышышт – Хазиева Динара Геннадьевна полшен. Лач тудо ныл ий жапыште ушан наставник да аралыше, тыршыше «кокымшо ава» да йолташ лийын. Лач тудлан ме шке икшывына-влакым ӱшаненна да ик пырчат ӧкынен огынал.

Динара Геннадьевна эн кӱлешан пашам эртарен: лудаш да возаш, шотлаш гына туныктен огыл, тыгак кажне йочам кидше гыч кучен школ илышыш конден. Кунам тудо икымше гана класс шагатым вӱден, латкандаш мужыр шинча тудын ӱмбаке ӧрмалген онченыт. Шукыжо вожылыныт, ойгыреныт, южиктыже лӱдынат. Ныл ий эртымеке, чылт палыдыме айдеме нунылан эн лишыл лийын. Тудо пеҥгыдын йодшан да тыгодымак поро улеш. Пашаже шуко гынат, кажне тунемшылан тудо жапым муэш.

Динара Геннадьевна илыш энергийже дене ӧрыктара: кеч-могай мероприятийыштат башкир, татар куштымашым кушталтен пуэн, йоча-шамыч дене флешмобым эртарен кертеш. Пуйто, шочынак артист улеш. Тидыжым ме шукерте огыл шке шинчана дене ужна. Тудо Ф. Буяковын пьесыж почеш шындыме «Выходили бабки замуж» спектакльыште Галинан рольжым пеш мастарын модын ончыктен. Оҥай, чолга. Илышыштат тыгаяк улеш. Тудо – «Башкортостан Республикысе образованийын отличникше».

Кузе тудо чыла вере етша, шонен от му. Очыни, секретшат тыглай: Динара Геннадьевна шке пашажым, шке ешыжым да илышым йӧрата.

Таче Динара Геннадьевна, кузе ойла, мемнан икшывына-влакым кокымшо пачашышке ужата. Тиде йочасад деч вара эше ик этап лийын. Нунын адак у илыш тӱҥалеш. Йӧратыме туныктышо олмеш тушто адакат у айдеме, у туныктышо лиеш. Мыланна адакат, ныл ий ончычсо семынак пиал шыргыжалеш манын, ме ӱшанена. А Динара Геннадьевна эше кужу жап шке выпускникше-влак дене кылым кучаш тӱҥалеш.

Динара Геннадьевна, порылыкда, йӧратымашда, талантда да кӱкшӧ профессионализмланда кугу тау. Таза лийза, ончыкыжымат тыланда пиал дене сеҥымашым гына тыланен кодына.

О. Айгильдина.