Калтаса ужара
+20 °С
Пылан
Все новости
Новости
11 Июнь 2019, 12:18

Шӱм-чон шупшмо верыште лийман

Вера, Замира и Зухра – кум ака-шӱжар, кум пӱрымаш

Башкортостан Республикыште здравоохраненийлан 100 ий темме вашеш ме мемнан районышто здравоохраненийым вияҥдымашке кугу надырым пыштыше еҥ-влакым, нуно кызыт сулен налме канымаште улыт, а кӧ-дыр ош тӱня дене чеверласен, шарналтена. Нуно шке моштымашыштым, шинчымашыштым, шке паша верыштым мыланна, кызыт тыршыше медицине пашаеҥ-влаклан, пуэныт.
Тиде медшӱжар-влак Р.Г. Ахметова, Е.И. Абдуллина, Н.Б. Ахметдинова, Е.Е. Безымянникова, Н.А. Валикаева, Т.В. Васина, Г.Н. Габдуллина, Д.Ф. Давлетгареева, Л.Я. Илинбаева, Г.Т. Имамова, Н.М. Климовских, Л.Е. Лобина, М.А. Имашева, С.М. Назмиева, З.А. Насретдинова, З.В. Пацева, Д.К. Петряева, Б.Н. Сабитова, Н.Р. Сатылбаева, Д.Н. Сокова, В.Д. Сокова, Р.Х. Сыраева, В.В. Старцева, З.Н. Ситдикова, Р.Х. Шайхылимамова, Т.К. Шайдуллина, А.Д. Миннилина, Р.А. Мулланурова да молат. Таче мый тыланда кум ака-шӱжар Асраровмыт, кызыт Газизова, Мусина да Ахметова нерген ойлем.
Школым тунем пытарыме деч вара чыла кум ака-шӱжар Вера, Замира да Зухра икте почеш весе Бирск оласе медучилищым тунем пытареныт да Калтаса селасе райэмлымверын хирургий пӧлкашкыже пашам ышташ толыныт. Хирургийыште тунам ойленыт: «Кунам кум ака-шӱжар-медшӱжар-влак пашаште – тужеге чыла сай лиеш». Изашт Фирдаус Асраров, 1976 ийыште Уфа оласе мединститутым тунем пытарымыж деч вара мемнан эмлымверыште врач-терапевт лийын пашам ышташ тӱҥалын, а 1985 ий гыч да кызытсе марте Нефтекамск оласе эмлымверыште тырша. А.А. Саматовым, И.М. Куловым, Ю.К. Соболевым, К.Г. Нурисламовым, Ш.А. Салиховым, Р.М. Хамидуллиным, Х.А. Хабировым, С.Г. Курмашевым порын да тау мут дене шарналтат.
Вера кужу жап старший, вара эмлымверын тӱҥ медшӱжарже, анестезистка да рентгенлаборант лийын пашам ыштен. Кушто пашам ыштен огыл гынат, тудо шке пашажлан вуйын шоген, шкеж деч да моло-влак дечат пеҥгыдын йодшан лийын. Кызыт ветеран-влакат тудым шарнен ойлат. Медицине пашаеҥ-влакын профушем райкомитетым вуйлатен.

Зухра хирургийыште пашам ыштыме жапыште пединститутын биофакшым тунем пытарен да 1976 ийыште санэпидстанцийыште врач-бактериолог лийын пашам ышташ тӱҥалын. Чыла кум эмлымверын комсомол, вара парторганизацийын секретарьже лийын. Чолган пашам ыштымыжлан тудым райком партийын аппаратышкыже кусарат. 1982 ий гыч сулен налме канышыш лекмыж марте – 26 ий утла – калыкым социально аралыме пӧлкам вуйлатен, республикыште эн сай пӧлка лийын. Кӱкшӧ организаторский способностян, профессионал улмыжлан, Краснохолмский селаште ветеран-влаклан профилакторий пӧртым, Кӧтерем поселкышто реабилитаций рӱдерым да Калтаса селаште икшыве-влаклан соцприютым почмыжлан тудлан «Заслуженный работник Соцзащиты РБ» лӱм пуалтын, тыгак «Почетный работник Соцзащиты России» нагрудный знак дене палемдалтын.
Замира моло ака-шӱжар деч тыматле улмыж дене ойыртемалтын, но тидын годым лӱддымӧ лийын, нимо деч лӱдын шоген огыл. Сандене тудым туберкулез ваштареш кабинет вуйлатышылан шогалтеныт. Тылеч вара тудо тыште 28 ий В.П. Исинбаев дене пырля пашам ышта, район мучко паша дене кудалыштыныт, йочасад, школ, фермылашке пуралт лектыныт, Манту пробым, БЦЖ вакциным шынденыт. Вер гыч верыш кондыштарыме флюорографий дене черле-влакым пален налыныт да Ф.С. Закирзянов да Л.С. Гарифуллин дене пырля нуным эмленыт, санбюллетень-влак тунам районысо чыла фермылаште висен. Икманаш, ты черым «кормыжышто» кученыт.
Фтизиатрический службо чер-влак показатель шотышто да тудым эмлымаште Башкортостан Республикыште кӱкшӧ уровеньыште лийын. Шарнем, кунам мый прививочный медшӱжар лийын пашам ыштымем годым, Замира Галимовна мыйым нине прививкым шындаш туныктен. «Медшӱжар – шӧртньӧ кид» конкурслаште призан вер-влакым налын, чыла соцтаҥасымашлаште участвоватлен, районысо эмлымвер да профушем деч ятыр таум каласыман серыш дене палемдалтын. Субботниклаште пашам пырля ыштыме йолташыже-влаклан тӱрлӧ мыскарам ойлен воштылтен, поро, сай кумылан лийын, чылаштымат тыгаяк оптимист, илаш да пашам ышташ таратен.
Нуно кызыт чыланат сулен налме канымаште улыт. Икшывышт да уныкашт-влакым сеҥымашыштлан куанен илат. Медицине пашаеҥ-влакын кечышт деч ончыч ме ветеран, ош халатан чыла еҥым шокшын саламлена. Нунылан пеҥгыде тазалыкым, чытымашым, сай дежурствым, пеҥгыде нервым, еш пиалым тыланена. Тау тыланда, тыгай кӱлешан пашам шуктымыланда.
К. Бикмурзина.