Ойлат, Сабантуй – тиде кеч-могай игечыштат эртыше пайрем. Туге гынат, йӱран игече-влак деч вара ояр кечым ужмо шукта. Тиде кечын Юмыжат калыкым колын, очыни. Игече шокшо да ояр лийын. Эрденак, пайрем тӱҥалме деч икмыняр шагат ончычак, тудым эртарыме площадкыш калык погынаш тӱҥале: выставке павильон-влакым, калык кудывече-влакым ямдыленыт. Палатке-влак воктене ужалыше-влак шке сатуштым темленыт, аттракцион-влакым ямдыленыт, тӱҥ сцене воктене артист-влак репетицийым эртареныт, спорт таҥасымашын организаторжо-влак площадке-влакым ямдылыме пашам мучашке лишемденыт.

Сем чарна веле, вигак майдан покшеке район пасулаште шошо агаште тыршыше технике лектеш. Икте почеш весе мини-трактор, «Беларус», кугу куатан «Кировец» ден «Джон Дир» трактор-влак.

Сабантуйым арамлан огыл каш да ончыкылык кинде лектыш пайрем маныт. Сабантуй – тиде шошо ага ден шудо жапысе границе, лач тыгодым ял калык изиш каналта.

Сабантуйын чапле йӱлаже уло – шошо агам пытарыме деч вара мланде пашаеҥ-влакым чапландарат.

– Поян Калтаса мландыште районысо ялозанлык отрасльын ик эн сай пашаеҥже-влак погыненыт, – каласен пайремым почшыла шке саламмутыштыжо район администраций вуйлатыше Ю.М. Садыров, – тракторист, машинист, комбайнер, водитель, вольык ончышо, озанлык-влакын специалистышт ден вуйлатышышт-влак. Вет нунын деч посна пайрем ок лий ыле. Тений икияш культурым 20 тӱжем утла гектарыште ӱдымӧ. Районышто шошо агам эн ончыч Зайникаев Василий Фридриковичын озанлыкыштыже да «Восход» СХК-те пытарыме. Пасу-влакым тергымаште эн ончылно «Восход» СХК ден Бикмурзинынын КФО-жо улыт. Икымше озанлыкыште шошо агам эн ончыч пытареныт да 2300 гектарыште пырчан культурым ӱденыт. Бикмурзин Владислав Петровичын кресаньык-фермер озанлыкыштыже 3,5 тӱжем гектарыште пырчан культурым ӱдымӧ. Тыгак «Победа» ООО-м, «ИТС-Агро» ООО-м, «Мельник» ООО-м, Шуматбаевын, Яшкинан, Минилбаевын кресаньык-фермер озанлык-влакым палемдаш кӱлеш. Ялозанлык пашаеҥ-влакым пашам тыршен ыштымышт дене саламлена.

Район калык дене унамытлан тазылык ден поянлыкым тыланымеке, район вуйлатыше 2019 ийысе Сабантуйым почын.

Российын, Башкортостанын да Калтаса районын флагыштым нӧлталаш «Восход» СХК-ын тӱҥ агрономжо Е.К. Зайнетдиновлан, Бикмурзин КФО вуйлатыше В.П. Бикмурзинлан да «Победа» ООО вуйлатыше Р.Р. Низамутдиновлан почетан права пуалтын.

Йолташетым каш пайремыш ӱж

Пайрем, поснак Сабантуй, уна-влак деч посна нигузе лийын ок керт. Республике вуйлатыше-влак лӱм дене пайремыш погынышо калыкым Башкортостан Республикысе ужалыме да потребитель-влакын праваштым аралыше Кугыжаныш Комитетын вуйлатышыже Г.Н. Асылова саламлыш. Гузель Наиловна район калыкым пашам тыршен ыштымыжлан отраслевой награде-влак дене палемдыш. Чап грамото дене «Восход» ялозанлык кооперативын вуйлатышыже Д.А. Низамутдиновым, «Весна» ООО директоржо С.В. Мухтаровым, индивидуаль предприниматель-влак С.А. Хузинам, Г.М. Абзаловам, З.М. Сапаевам, Н.М. Ханнановам, «Неон» столовыйын поварже Г.Д. Шайдуллинам, «Весна» ООО-н кондитерже Р.А. Шайнуровам палемдыш. Тауштыме серыш дене район администрацийын экономике пӧлкажын тӱҥ специалистше Н.В. Быковам, индивидуальный предприниматель Н.Ф. Шартдиновам, кресаньык-фермер озанлык вуйлатыше В.Ф. Зайникаевым палемдыме.

БР-се ялозанлык министерствын научно-образовательный учреждений-влак кокласе вашкылым шочыктен шогышо пӧлкан вуйлатышыже К.В. Пресняковат саламмут деч вара республикысе ялозанлык министерствын ведомственный наградыже-влакым кучыктен. Чап грамото-влак дене Бикмурзин КФО-н механизаторжо В.П. Бикмурзиным, кресаньык-фермер озанлык вуйлатыше М.А. Казанчеевым, «Восход» СХК-ын машина дене лӱштышӧ операторжо Р.Т. Камалетдиновам. «ИТС-Агро» ООО-н исполнительный директоржо С.А. Огуречниковым, «Победа» ООО-н презе ончышыжо Л.М. Тимербулатовам, кресаньык-фермер озанлык вуйлатыше Е.П. Шашиевым, Савакмарий ялсовет администраций вуйлатыше Р.М. Арслановым, Ӱлыл Качмаш ялсовет администраций вуйлатыше И.И. Ижбулатовым, Кугу Качак ялсовет администраций вуйлатыше Г.Д. Хайдаршиным палемденыт.

Тыгак пайрем награждатлымашым Калтаса сабантуйын пагалыме унаже – Российын Геройжо А.В. Панфилов – умбакыже шуен. Александр Вячеславович шке землякше-влакым саламлымеке, мемнан районысо ик эн сай тунемше-влаклан окса сертификатым кучыктен. Сирийысе военный операцийын участникше, Шоръялын шочшыжо Андрей Асылбаевлан Панфилов Россий обороно министерствын медальжым кучыктен.

Калтаса район муниципаль район Советын пунчалже почеш Абзалов Ибрахим Нафкатовичлан «Калтаса районын почетан еҥже» лӱмым пуымо. Медальым да удостоверенийым тудлан Сабантуй пайремыште район администраций вуйлатыше Ю.М. Садыров кучыктен.

Сабантуй – паша пайрем, кӧ пашам сайын ышта, тудо сайын кана. Пайремыште тыгак киндым ончен куштышо ден вольык ончышо-влакымат чапландареныт. Шошо агам иктешлымеке, сеҥыше-влакым палемденыт. Икымше верым «Восход» СХК (вуйлатыше Д.А. Низамутдинов) налын. Кокымшо вер – В.П. Бикмурзинын кресаньык-феомер озанлыкше. Кумшо – «Победа» ООО (вуйлатыше Р.Р. Низамутдинов). Механизатор-влак Имуков Алексей Валентинович (Бикмурзин КФО) икымше лийын, кокымшо верым «Победа» ООО гыч Андрей Галинурович Исанбулатов ден «ИТС-Агро» ООО гыч Сергей Александрович Агапов, кумшо – «Восход» СХК гыч Григорий Ибаевич Иргибаев, кумшо Бикмурзин КФО гыч Денис Васильевич Васильев. Тиде кечын ферме ден пасулаште тыршыше пашаеҥ-влакым чапландареныт.

Калыкын шӱм-чонжым ончыктеныт

Кажне Сабантуйышто калык кудывечым, ялсовет-влакын тыршен ыштыме пӧрт-влакым ончыктымашышт ик эн кугу ужашышкыже савырнен. Нунын деч посна ты пайремыште йӧкрок лиеш ыле дыр. Башкир кудывечын озаже-влак – Краснохолмский селаште илыше калык да «Ватан» общественный организаций – унамытым мотор куштымаш дене вашлийыныт да юртыш пуралт лекташ ӱжыныт. Келтей да Тошто Яш ялсовет-влакын тыршымышт дене ыштыме руш кудывечым кидпашалан уста ӱдырымаш-влакын Ирина Пашинан, Надежда Савельеван, Регина Зарипован пашашт дене сӧрастареныт. Тыште тӱрлымӧ картинке, ажурный шаль – чылажат моткоч келшен. Ӱлыл Качмаш, Калегин, Калмиямучаш да Амчемучаш ялсовет-влакын марий кудывечышт ландшафтный дизайн дене ойыртемалтын. Пушеҥге гыч ыштыме вынем, орва дене имне, мардеж вакш, оҥай паровоз-мангал – тиде Амчемучаш ял гыч мастар Леонид Нуриахметовын пашаже. Савакмарий ялсовет да районын татар обществе шке кудывечыштым оформитлымаште татар калыкын йӱлажым ончыкташ тыршеныт. Унамыт ялысе ӱмбалым, ӱйым да катыкым тамлен онченыт.

Удмурд кудывечыште (Кугу Качак да Тӧлдӧ ялсовет-влак) весела муро, калык кочкыш дене унамытым вашлийыныт, а юртыш ончалын нунын культурышт, йӱлашт дене палыме лийыныт.

Йоча тӱня

Калык кучывече ваштареш йоча творчестве выставке верланен лийын. Тыште йочасадын, школ деч ӧрдыжтӧ туныктымо рӱдерын кружоклашке, «Шонанпыл» йоча усталык пӧртыш коштшо икшыве-влакын пашаштым ончыктеныт. Тыште могай технике дене гына ыштыме пашам ужаш лийын. Чылажымат шотлен пытарыш ок лий.

Мо дене эше Сабантуй ӧрыктарен?

Имне дене таҥасымаш

Вийым тергена

Вашкерак, кӱшкырак, писынрак

Волейбол ден шахмат

Вараш кӱзаш куштылго огыл

Икшыве-влаклан куан