Айдимир Баиров имне артиллерийыште эн сай лийын

Лӱддымылыкым да патырлыкым ончыктымыжлан тудым III-шо степенян Слава орден дене да «За отвагу» салтак медаль дене палемденыт.

Айдимир Баировым сар лачак демобилизаций тӱҥалме годым вашлийын. Ушыж дене тудо шукертак мӧҥгыштыжӧ, шочмо У Яш ялыштыже лийын, родо-шочшыжо-влакым ӧндалын.

Эрдене, 22 июньышто, чыла полкым тревого почеш нӧлталыныт. А кастене, вагонлашке шынден, касвелышке колтеныт. Кокымшо Краснознаменный Северо-Кавказский дивизийын артиллерий батарейын имне дене коштшо Айдимир Баировлан сар тӱҥалтыш тыгерак шарнымашешыже кодын.

Москва деч кредалын чакненыт, а вара икымше да нылымше Украине фронтын составыштыже, Украинын олаже-влакым утарен, Берлин марте шуын.

Ала-могай палыдыме вий тудым пуля ден осколко-влак деч арален. Сар мучко тудо ик ганат сусырген огыл. Тыгак тудын ик имньышкыжат тушманын пуляже логалын огыл. Изинекак тудо имне-влакым йӧратен. Имне-влакат тудым ончалтышыж гычак умленыт. Тудын чыла командыжым раш шуктеныт. Теве тудын наградной листыштыже тыгерак возалтын:

«1945 ий 15 гыч 17 апрель марте орудийын рядовойжо Баиров лӱддымылыкым да патырлыкым ончыктен. Тушман ваштареш лӱйкалыме годым Баиров йолташ имне-влакым эре ямдылен шога да кунам тушманын артиллерийже батарейын огневой позицийжым лӱйкалаш тӱҥалеш, Баиров вашке гына имне-влак дене артиллерийым вес позицийыш кусара. 17 апрельыште кредалме годым кок салтак строй гыч лектын, тыгодым Баиров шке кумылын расчетлан тушманым пытараш полшен. Тыште тудын боевой расчетшо тушманын ик пулеметшым шалатен да 7 гитлеровецым пуштын.

Баиров йолташым правительственный награде, III-шо степенян Слава орден ден наградитлаш палемдыме.

871-ше стрелковый Краснознаменный полкын командирже, подполковник Черный.

Май 1945 ий».