Совет Ушемын Геройжо Дмитрий Ильич Лазаревын тукымжо шке шочмо-кушмо кундемжым ок мондо

Братовщина ял, Совет Ушемын Геройжо Д.И. Лазаревын шочмо-кушмо верже нерген поэт Николай Пряхин пеш чапле почеламутым возен. Тудо изиш шӱлыканрак. Тидым умылаш лиеш. Вет почеламутым поэт 1996 ийыште шочыктен. Тылеч вара 20 ий утла эртен. Братовщина ялын тӱсшӧ, а тудо кунам дыр кугу руш села лийын, ятырлан вашталтын. Ты ял гыч лекше-влаклан кӧра тудо тӱзлана. Угыч Братовщина пасулаште технике мӱгырымӧ йӱк шокта. Тиде «Агро» ИТС ООО-ын комбайнже-влак шурно пасум тӱредыт. Тудым Попов Михаил Леонидович вуйлата. М. Поповынат тукым вожшо тиде мланде дене кылдалтын. Тудлан кӧра Братовщина кундем умбакыже тӱзлана.

Совет Ушемын Геройжо Дмитрий Ильич Лазаревын тукым шольыжо – Лазарев Александр Григорьевичат шке кугезыжын мландыже нерген ок мондо. Кажне кеҥежым тышке толеш. Шочмо-кушмо верыш шӱм-чонжо шупшеш. Тыште тудо шочын, кушкын. Ты мландыште тудын кугезыже-влак кият. Александр Григорьевичын лач ты ава-мланде дене волгыдо шарнымашыже кодын. Сандене шке шочмо Братовщина ялышт нерген ынышт мондо манын, шкеж деч шогышыжым чылажымат ышта. 2012 ийыште «Салам лийже, ик ялын шочшыжо!» пайремым организоватлен. Братовщина ялыште шочын-кушшо чыла еҥжым, кызыт нуно Волгоград, Волжск, Челябинск, Екатеринбург да элнан моло олалаштыже илат, иктыш чумырен. Тылеч вара кажне кеҥежым палемдыме кечын шочмо кундемыштыт погынат. Тӱҥалтыште нуно Совет Ушемын Геройжылан да Кугу Ачамланде сарыште лийше салтак-влаклан стеллышке пеледышым пыштат, а умбакыже – муро, Керей эҥер дене такмак-влак кужу жап йӧҥгалтыт.

Мут толмашеш, Керей эҥер нерген. Тений кеҥежым Александр Григорьевич угыч шке шочмо мландышкыже толын. Керей эҥер сер воктеке лектын. Тудо тудлан моткоч шӱлыкан чучын. Вет тудым пӱялыме огыл. А пӱя деч посна эҥер – тиде эҥер огыл. Шке йолташыжым, лишыл родо-шочшыжо-влакым чумырен да Керей эҥерым пӱялаш каҥашеныт. Тыште нефть отрасльын ветеранже Павел Артамонов икымше полышкалышыже лийын. Тудо ялсовет, нефтяник-влак деке полышым йодын миен. Нуно полшаш кӧненыт. Техникым ойыреныт. Кум кече паша шолын. Пеш чапле пӱя миен лектын. Конешне, окса шотышто Александр Григорьевич полшен.

Ындыжым Керей эҥерым куанен ончет. Поснак кече шичме годым тудо моторын коеш. Мый ӱшанем, кунам дыр иктаж-могай поэт тиде моторлыкым ончен угыч почеламутым воза.