Кияр лышташ тӱр молан нарынчалга?

Йыраҥыш луктын шындыме кияр шудо лывыжгыме гай коеш да лышташыже нарынчаҥыныт – тугеже жапым йомдарыде эмлаш тӱҥалман. Но тылечат ончыч нарынчалгыме амалжым пален налман.

Нарынчалгыме амалым пален налмеке, ончыч кушкылым эмлыман. Мландым ӱяҥдыме огыл, ешартыш кочкышым пуэн шуктымо огыл але лышташ кенета стрессым налын гын, к ушкылым вияҥдаш тӱҥалман.

Эмлыме ешартыш кочкышат тӱрлӧ лийын кертеш. Тыгай сӱрет палдырныме годым виян ӱяҥдыш семын азот-фосфор-калий негызан вартышым, кевытыште налме ямде комплексым але шке ямдылымым кучылтмо ик семынак пайдале. Кияр шудо (окопник) настой гыч шке ямдылыме ешартыш кочкышат кушкылым писын вияҥден кертеш. Тудым ышташ жап шуко ок кай. Тидлан 1 кг тыгыдемдыме ужар вартышым 10 л вӱдыш ешарыман, 7 сутка чоло шуын шинчыктыман. Ямде нугыдо 1 ужаш концентратым 9 ужаш леве вӱдеш шулыктарыман. Вишкыдемдыме вартышым кияр йыраҥыш кас велеш шавыман.

Лышташ нарынчаҥме пале шуэн да верын-верын веле шинчаш перна гын, марганцовкым але кинде-йод настойым кияр шудо ӱмбак шыжыктыман. Марганцовко растворым 1 процентаным ойырен налман. Кинде-йод настойым ямдылаш (10 л вӱдеш шулыктараш) 1 сукыр кинде ден 1 изи ате йодат сита. Леве вӱдеш шулыктарыме настойым кастене ямдылыман да эрлашын эрдене эмлыше «эликсирым» кияр шудыш шыжыкташ гына кодеш.

Нарынчаҥаш таратен кертше амал-шамыч:

1. кушкыллан вӱдыжгӧ ок сите;

2. мландым ӱяҥдаш але тудлан ешартыш кочкышым пуаш кӱлеш;

3. луктын шындымеке кылмен кертын;

4. вож эмганен але рокышто илыше насекомый пӱчкын;

5. лышташ тура кечыйол йымалан йӱлен кошкен;

6. лышташ кенета стрессым налын.