Кугезына-влак тыге паленыт

Ожно кугезына-влак вольыкын могай улмыжым тӱрлӧ пале гыч шижын моштеныт. Южо палыжым кызытат кучылтшо-шамыч улыт. Мутлан, ушкал тӱж але укем кузе пален мошташ?

Тӱжаҥмеке, ик тылзе гычак шӧржым ончен палаш лиеш. Тӱж ушкалын шӧржым вӱдыш чӱчыкташ гын, тудо вӱд йымаке волен кая, а исырын – шарла да вӱдым ошемда. Науко могырым тидым умылтараш неле. Но, палыше-влакын ойышт почеш, тыгай пале варажым тӱрыс пеҥгыдемдалтеш.