Балтий флотын морякше

Кажне призыв годым мемнан район гыч салтак радамыш 50 утла рвезым налыт. А нунышт шке воинский порысыштым уло кумылн шуктат. Тидын нергнен рвезе-влакын служитлыме частьла гыч ача-ава лӱмеш толшо таушытыме серыш-влак ойлат.

Шукерте огыл тыгай серыш Калтаса села гыч Набиуллинмыт Эрнест Рифович ден Венера Михайловна лӱмеш толын. Нунын Антон эргышт Балтий флотысо «Королев» десант кугу корабльыште службым эрта. Тудо 2 №-ан Калтаса кыдалаш школым тунем пытарен, вара Москвасе экономический институтын Ижевскысе филиалыштыже шинчымашым поген. Вузым тунем лекмекыже Антоным армий радамыш налыныт. Виян, таза рвезым вигак флотыш колтеныт. Ломоносов олаште учебный батаоьонышто связын младший специалистше-влакым тунемме курсым пытарымеке да специальностьым налмеке, тудым десантный корабльыш Балтийск олашке колтеныт.

«…Антон уло кумылын тудын вачӱмбаке пыштыме заданий-влакым шукта. Шкенжым пашам йӧратыше, поро велым гына ончыктен. Службым эртыме жапыште тудо пеш сайын военный специальностьшым тунем шуын, сай да ӱшанле йолташ-влакым муын. Тендан эргыдам службым сай намийымыжлан командований ик гана веле огыл кумылаҥден. Тыгай чапле эргым ончен куштымыланда, кугу тау!» – воза Антонын командирже ача-аважлан.