Калтаса ужара
+20 °С
Пылан
Все новости
Новости
31 Сорла 2019, 17:37

Вате-марий Зубаировмыт уло илышыштым ветеринар пашалан пӧлекленыт

Вате-марий Зубаировмыт уло илышыштым ветеринар пашалан пӧлекленыт Нуным Калтаса районысо «Айболит-влак» манаш лиешТаче нунын профессиональный пайремышт

Нуным Калтаса районысо «Айболит-влак» манаш лиеш
31 августышто Российыште Ветеринар пашаеҥын кечыжым палемдат. Вате-марий Физиля Сулеймановна ден Ришат Зайнибашарович Зубаировмыт шке илышыштым ветеринар паша дене кылденыт. 35 ий утла нуно Калтаса районысо ветстанцийыште тыршат.
Ришат Зайнибашарович Кӧгерчен районысо Мраково селаште шочын. Ача-аваже Зайнибашар Кутдусович ден Хазияр Губайдуловна туныктышо лийныт. Ачаже партий органлаште тыршен, сандене партий кушко колтен, тушко каяшыже логалын. Вич ий гыч Ришат Зубаиров Зианчура районсо Новые Чебеньки ялыште илаш тӱҥалын. Верысе кандашияш школым тунем лекмекыже, тыште сулен налме канышыш лекмекыже Зайнибашар Кутдусович директор лийын тыршен, Ришат Стерлитамакысе совхоз-техникумын ветеринар пӧлкашкыже тунемаш пурен.
– Вольыкым йӧратымемлан кӧра, мый тышке тунемаш пурышым, – ойла кызыт Ришат Зайнибашарович. – Ялыште иленна, озанлыкыште вольыкым кученна. Мый нуным ончаш, пукшаш-йӱкташ йӧратенам, ял кӱтӱм кӱтенам.
Совхоз-техникумым Ришат отличий дене тунем пытарен. Тиддеч вара тудо шочмо районысо «Иняк» озанлыкыште старший ветврач лийын тыршен. Кок ушкал фермым, кайыквусо фермым, имне фермым да кок ял вольыкым эмлен. Самырык да пашам йӧратыше специалистым озанлык вуйлатыше-влак башкир ялозанлык институтыш тунемаш колтат. Ветеринар факультетыште тунеммыж годым Ришат кугу мер пашам намиен, шымылыме пашам шуктен. Студент-влак коклаште эртарыме научный конференций ден всесоюзный конференцийлаште ончыл верлам налын.

Ришатын студент илышыштыже эн тӱҥ событий тунеммаш дене огыл кылдалтын лийын. Тыште тудын шкенжын пӱрымашыжым муын. Физиля Сулеймановна тиде институтыштак Ришат Зубаировын группыштыжак тунемын. Кумшо курсышто нуно ешым чумыреныт. Самырык вате-марийлан тӱшкагудышто посна пӧлемым пуэныт.
Идалык гыч ӱдырышт шочын, тудлан Гульназ лӱмым пуэныт.
Физиля Сулеймановна Кучаш ялыште шочын-кушкын. Верысе кыдалаш школым тунем пытарымыж деч вара Башкир ялозанлык институтын ветеринар факультетышкыже тунемаш пурен. Тудат, Ришат Зайнибаширович семынак, янлык ден вольыкым йӧратен. Ачаж ден аваже Сулейман Кашапович ден Алина Ахунъяновна Кашаповмыт колхозышто тыршеныт. Озанлыкштышт ятыр вольык ден кайыквусым онченыт.
Институтым тунем лекме деч вара вате-марий Зубаировмыт 1984 ийыште Калтасашке илаш толыт да районысо ветстанцийышке пашашке пурат. Физиля Сулеймановна ветврач-токсиколог лийын тыршаш тӱҥалеш, вара ветврач-терапевт лиеш, ветстанций вуйлатын алмаштышыже, кугыжаныш ветконтроль вуйлатыше. Кызыт ветстанцийын вӱдышӧ ветврачше улеш. Кумло вич ий тудо шке илышыжым ветеринар пашалан пӧлеклен.

Ришат Зайнибашарович Калтаса ветстанцийыште ветврач-эпизоотолог лийын тыршаш тӱҥалын. Кызыт ветсанций вуйлатышын алмаштышыже улеш. Тудо шке пашажым моткоч чот йӧрата да тудлан вуйын шога.
Вате-марий Зубаировмытым пашам пырля ыштыме йолташышт-влак, район калыкат пагалат. Илышыштыт да пашаштат нуно примерым гына ончыктен шогат. Кум икшывым – кок ӱдырым – Гульназ ден Гульнурым да ик эргым – Ильгизым – ончен кугемденыт.
Ветеринар врач Зубаировмытын тыршымыштлан кӧра мемнан районышто вольык-влакын нимогай лӱдыкшӧ инфекционный чер шарлен огыл.