Нунын деч вара корно-влак кодыт

20 октябрьыште Российыште Корно озанлык пашаеҥ-влакын кечыштым – водитель, пашазе, проектировщик, механизатор, икманаш, кӧ нимогай игечым шотыш налде мемнан корнынам олмыкта да чоҥа – палемдат.

Кӱкшӧ скорость да у технологий, промышленность вияҥмаш – чыла тиде сай транспортым гына огыл йодеш, тыгак корнат сай лийшаш. У корным шочыктат да тоштыжым олмыктат – чыла тиде пашам корно озанлык пашаеҥ-влак шуктат. Тиде отрасльыште тыршыше специалист-влакын пашашт нерген мыланна Калтаса ДРСУ-н вуйлатышыже Ф.М. Халиуллин каласкалыш.

– Корно озанлык пашаеҥ-влакын кечыштым мемнан элыште 1996 ий гыч палемдаш тӱҥалыныт. Тудлан тӱҥалтышым президентын пунчалже пыштен, тудын дене келшышын, кажне ийын, октябрьын кумшо рушарняже Корно озанлык пашаеҥ-влакын кечышт семын палемдалтеш.

Ты пашазе-влакын сай пашашт деч корно дене кудалше еҥын лӱдыкшыдымылыкшӧ шога. Корно пашаеҥ-влак корным веле огыл олмыктат, тыгак нуно тушто разметкым, корно знак-влакым текшырышаш улыт, иян корно годым ошмам шавышаш, а луман годым – эрыктышаш. Нунын ончылно шогышо задаче-влакым шотленат пытараш ок лий. Конешне, мемнан пашаштат шуко пӱсӧ йодыш лектын шога.

– Чын. Кеч-могай предприятийыште паша коллектив деч шога. Калтаса ДРСУ-то 43 еҥ тырша. Нуно чыланат шке пашаштым сай палыше профессионал улыт. Икмыняр пашаеҥ мемнан дене лу ий утла дене тыршат. Тыгак самырык-влакат улыт. Мый шке коллективем дене кугешнем. Кажне пашазылан техникым пеҥгыдемдыме, а нунышт эре тӱз да пашалан ямде улыт. Шуко пашаеҥым тӱрлӧ награде дене палемдыме. Тений гына ятыр ий пашам тыршен ыштымыштлан водитель-влак Шаяхметов Анатолий ден Гилязов Ильхамым «Башкиравтодорын» Чап грамотыжо ден Тауштыме серышыже дене палемдыме.

– Калтаса ДРСУ тачысе кечылан район мучко 357 километр корным онча. Нунын коклашке тыгак региональ корно участке-влакат пурат. Тиде – Уфа-Янаул да Дӧртӧльӧ-Уфа, тыгак межрегиональ корно – Кузбай – Янаул ден Краснохолмский-Нефтекамск. Корнылан моло ужашыже – ялсоветла кокласе корно-влак. Тушеч 97 километрыш асфальтым шарыме. Тыгак ДРСУ район мучко 349 вӱдым колтышо пуч-влакым онча да олмыкта.

Тений ме Ӱлыл Качмаш – Калегин ден Краснохолмский – Васола муниципаль корным тӧрленна. Уфа-Бирск-Янаул, Краснохолмский – Нефтекамск корнылаште ГОСТ дене келшен толдымо корно знак-влакым вашталтыме, корно тӱр-влакым пеҥгыдемдыме, автопавильон-влакым вашталтыме да моло пашамат шуктымо. Таче мемнан пашаеҥна-влак Краснохолмский – Нефтекамск автомобиль корнышто 10 километр барьер огражденийым вашталтат да 22 километр кужытышто вондерым руат.

Тений тыгак автопарк у технике-влак дене пойдаралтын. «Беларусь» у тракторым нална, тудын дене Асхат Тазетдинов тырша. Тыгак ик у «КамАЗ»-ым налме. 17 октябрьыште, Корно озанлык пашаеҥ-влакын кечыштым палемдыме пайремыште, Башкортостан Республике вуйлатыше Радий Фаритович Хабиров «Т-150» трактор деч у суравочым кучыкта.

– Ончылно вуйын шогыман да шыгыр теле сезон лишемеш. Икымше лум дене мемнан пашаеҥна-влак лумым эрыкташ лектыт. 20 технике, нунын коклаште вич КДМ, грейдер, экскаватор, колесан куд трактор да моло технике пашалан ямде. Тыгак ияҥше корно ваштареш материал-влакым – ошма ден шӧнчал вартыш, шӧнчалым ямдылыме.

– Мемнан илышна чарныде корно движенийыште эрта. Корно пашаеҥын пашаже неле, но моткоч кӱлешан да пайдале. Кече мучко уремыште, игечым шотыш налде пашам ыштыман. Паша кече эрденак тӱҥалеш да пычкемыш кас дене пыта. Южгунам гын, сутка мучко пашаште лияш верештеш. Тӱрлӧ специализированный машина-влак улыт гынат, корно пашаеҥын пашаже неле. Сандене нуным поро мут дене профессиональ пайрем кечышт ваштареш гына огыл шарналтыман, а кажне кечын нунылан таум ойлыман.

– Чыла корно пашаеҥым профессиональ пайрем дене кумылын саламлем. Поснак шуко поро мутым мемнан ветеранна-влаклан каласыме шуэш. Нуно мемнан спискыштына 20 улыт.

Куштылго огыл пашаштыда чыла сайым гына, тазалыкым, пиалым тыланен кодам.