Ансамбльын шӱдыржӧ-влак

Калтаса селаште кеч-могай кугу мероприятий «Солнечные лучики» йоча вокал ансамбль деч посна ок эрте. Тачысе кечылан кугыеҥ да икшыве-влаклан нуно шокшым да куаным пӧлеклат. А тидыже мемнан илышыштына моткоч ок сите. Ты чапле коллективыште индеш ӱдыр, а тудым Лилия Ивановна Матвеева вуйлата. Репетиций мийыме годым ме нунын деке пуралт лекна.

– Мый Калтаса селасе Культура пӧртыштӧ 1998 ийыште пашам ышташ тӱҥальым. Икымше ансамбль «Кечыйол» манылтын. Тунам марла муро-влакым мурымаш гыч тӱҥалын. Икшыве-влаклан марла муро-влакым ойырен налаш неле лийын, сандене ме руш йылме дене мураш лийна. Документ-влак дене юватылаш огыл манын, ме ансамбльын лӱмжым руш йылмыш кусарышна. Тыге «Солнечные лучики» ансамбль лие. Тиде икымше состав лийын. Кум ий пашам ыштымеке мый подготовительный группым погышым, тыланыше-влак ятыр лийыныт. Ты составыш пурышо ӱдыр-влак дене вич ий пашам ыштем.

– Таче коллективыште индеш ӱдыр. Мыйын нунын лӱмыштым каласымем шуэш. Тиде Илтубаева Полина, Матвеева Элина, Матвеева Камилла, Минабашева Камилла, Пакриева Мария, Риянова Карина, Сайтаева Мария, Чулкова Дарья да Шайхутдинова Эмилия. Нуно чыланат 1 №-ан Калтаса кыдалаш школышто тунемыт. Нине ӱдыр-влак шке шӱм-чон ужашыштым мыланем ӱшанен пуэныт. Сандене шке пашаштем мый тӱням, айдемым да музыкым йӧраташ туныктем. Мый уло кумыл дене пашам ыштем.

– Шукыжо шке тыланымашыж дене толын. Нуно мыйын порылыкемым да икшыве-влакым йӧратымемым шижыт. Ӱдыр-влак мураш йӧратат, сценыш лектыт. Кажныже иктаж-мом уым пален налаш тырша. Южик ача ден ава коллективын илышыштыже чолган участвоватла. Но тыгайышт шукырак лийыт гын, сайрак лиеш ыле.

– График почеш, арнялан кок репетиций. Мураш тӱҥалме деч ончыч ме шӱлымӧ упражненийым, артикуляционный гимнастикым, скороговоркым эртарена. Вара мураш тӱҥалына.

– Коллективын репертуарже поян да тӱрлӧ. Ӱдыр-влак кумыл шуын эстраде, патриотический, лирический да калык муро-влакым йоҥгалтарат. Тудо тема да текст гыч шога да икшыве-влакын шӱм-чон шижмашыштлан келшен толшаш. Ме зритель-влакым ансамбльын мурыж дене гына огыл, тыгак сольный мурымаш дене куандараш тыршена. Мемнан дуэт-влакат улыт – Элина ден Камилла Матвеевмыт, трио – Элина Матвеева, Даша Чулкова, Полина Илтубаева. Мемнан самырык шӱдырнат уло – Элина Матвеева. Мут томашеш, тений тудо «Апрель – 2019» вокал искусствын республике йоча конкурсын II-шо степенян дипломжо дене палемдалтын.

– Тыршена, пашам ыштена. Кугу сеҥымашлашке шуаш мыланна эше мӱндыр. Ик гана веле огыл «Весенняя капель» самырык-влакын республике конкурсын район этапыштыже призан вер-влакым налынна. 2017 ийыште ме икымше гана район деч ӧрдыжкӧ – Бирск олаш лектынна. «Апрельские капели – 2017» муро да куштымаш XXIII-шо йоча фестивальыште участвоватленна. Эртыше ийын Уфа олаш мийышна да «Мы – дети одной планеты» республикысе интегрированный фестиваль-конкурсышто II-шо степенян дипломант лийна. Тений Дӧртыльӧ олаште «Весенняя капель» самырык дарований республике конкурс эртыш да ме III-шо степенян лауреат лийна. Награде-влакым налаш кумылло, но тидлан шуко тыршыман. Тиде сценыште гына чыла мотор да ояр. А илышыште йӧршеш весе. Тӱрлӧ проблеме-влак лектын шогат. Туге гынат полыш кидым шуялтыше еҥ-влак ятыр улыт. Наталья Колбиналан кугу таум каласыме шуэш. Костюм-влак шотышто проблеме лекме годым, тудо мыланна полша. Мемнан икымше нарынче тувырна да канде юбкына – тиде тудын кидпашаже. Эше тидым палемдаш кӱлеш, чыла костюмым мый шке оксам дене ургыктенам. А теве шукерте огыл «Культура малой Родины» партий проект почеш мыланна мотор концерт костюм-влакым ургышт. Моткоч кумылло, кунам вуйлатыше мыланнат тӱткышым ойыра да полшаш тырша.

А эн тӱҥжӧ – тиде ансамбльыште ӱдыр-влакын илышыштым оҥайрак ышташ тыршымаш. Пайрем, концерт да корнылаште коштмаш. Район деч ӧрдыжкӧ лекме годым нуно мемнан Калтаса селан чапшым аралыме нерген пеш сай палат.

– Мый шке пашамым моткоч йӧратем, палемдыме цельыш шуаш тыршем. А ӱдыр-влак мурым мураш йӧратат, а мый гын, нунын интересыштым вияҥдаш тыршем. Мыланем коллективыште улшо икшыве-влак – тиде кечыйол. Сандене сценыш лекмышт годым нуно шке ансамбль лӱмыштлан келшен толшаш улыт: калыкым шке кечыйолышт, мурышт дене ырыктышаш улыт. Ме нунылан кечым пӧлеклена.

– Тений тӱҥ составлан вич ий. Тиде изи юбилейышт дене ме нуным саламлена. Мутланымыланда кугу тау. Пашаштыда сеҥымашым тыланена.