Клара Алексеевна Садыкова – Башкортостан Республике образованийын отличникше

Садыкова Клара 1986 ийыште 3 №-ан Краснохолмский кыдалаш школышто пионервожатый лийын пашам ышташ тӱҥалын. Бирск олаште педагогика институтым тунем лекме деч вара тӱҥалтыш класслаште туныктышо лийын тыршен. Кеч-могай тӱҥалше туныктышын паша корныжо неле да шуко тыршымашым йодшан.

Клара Алексеевнанат корныжо тыгаяк лийын. Туныктышо лиймеке, тудо методический литературым шуко лудын, уста туныктышо-влакын уроклаштыже лийын. Тыгак икшыве-влаклан темым куштылгын да умылышашлык лийже манын йӧным кычалын. Клара Алексеевна тыгак класс деч ӧрдыжтӧ тематический мероприятий-влакым творески эртараш манын сай ямдылалтын.

Таче тудо кӱшыл категориян специалист улеш. Тыршымыже арам лийын огыл, ындыжым тудо шке пашаштыже сай результат-влакым ончыкта. Тудын туныктымо икшывыже-влак поро кумылан, ушан-шотан, общественно чолга, вияҥше, сай шинчымашан улыт да чумыр школ образованийын кокла ступеньышкыже ӱшанлын ошкылыт, руш йылме, математике да окружающий мир дене ВПР-ым сай сдатлат. Клара Алексеевна шкеж дечат пеҥгыдын йодшан улеш. Вет тудлан ятыр ача ден ава шке шӱм падырашыжым ӱшанен пуэн. Клара Алексеевна лӱмеш ача-ава да тунемше-влак профессионал пайрем кечын гына огыл, тыглай кечыштат тау мутым ойлат. А тунемшыже-влак тудын урокшым, весела пайремым, пӱртӱсыш поход дене мийымым, шочмо кундемын достопримечательностьшо дене палыме ыштыме поездке-влакым порын шарналтат.

Тудо кызытше илыш дене тӧр ошкылаш тырша, компьютерым да моло техникым шымлен, интерактивнй оҥа дене пайдаланен урок-влакым эртараш тырша.

Клара Алексеевна чолга илыш дене ила. «Талукын туныктышыжо» профессиональ конкурсышто участвоватлен да призер лийын. Тылеч посна тудо мураш йӧрата, кеч-могай пайремым сӧрастара.

Кок чапле икшывын аваже, йӧратыме уныка-влаклан кова, сай озавате, ушан-шотан ӱдырамаш улеш. Ме ӧрына веле, кузе тудо чылашкыжат етша. Пӧрт кӧргыштат сомылым шукташ, пакчаштыжат ару, мотор деч мотор, тӱрлӧ деч тӱрлӧ пеледыш-влак кушкыт, а ӱстембалне свежа шӧр, ӱмбал, торык, мӱй, пакчасаска емыж, фрукто, консерват-влак, чылажымат шке кидше дене ыштен. Тудым сырышым, шӱлыканым нигунамат ужын огынал. Кеч-кунамат поро кумылан, шыргыжалын мутланышан улеш. Тудо моторын илен мошта. Пашам пырля ыштыме йолташыже, тунемше-влакын ача-авашт, калык коклаште пагалымаш дене пайдалана.

Тений БР образований министерстве Клара Алексеевнам «Башкортостан Республике образованийын отличникше» нагрудный знак дене палемден. Школын коллективше, педагогика пашан ветеранже, тунемше-влак да нунын ача-авашт тудым ты сулло награде дене саламлат да Клара Алексеевналан пеҥгыде тазалыкым, пиалым да кужу ӱмырым тыланат.

3 №-ан Краснохолмский кыдалаш школын коллективше.