Калтаса ужара
+20 °С
Пылан
Все новости
Новости
9 Кылме 2019, 18:20

Калтаса районысо ГИБДД пӧлкаште шке пашаштым сай палыше профессионал еҥ-влак тыршат

Чыла участник – кеч тиде автомобилист, кеч йолешке, корнышто коштмо правил-влакым текшырен шогышаш – тиде ГИБДД инспектор-влакын тӱҥ пашашт.

Калтаса районысо ГИБДД пӧлкаште шке пашаштым сай палыше профессионал, айдеме-влаклан полышым ончыктышо, мемнан корнынам лудыкшыдымӧ ыштыше еҥ-влак тыршат
Чыла участник – кеч тиде автомобилист, кеч йолешке, корнышто коштмо правил-влакым текшырен шогышаш – тиде ГИБДД инспектор-влакын тӱҥ пашашт.
Тачысе кечылан Россий МВД-ын Калтаса районысо пӧлкажын ГИБДД пӧлкаштыже лу еҥ пашам ышта. Нуно чыланат профессионал улыт да шке пашаштышт ик ий веле огыл тыршат.
– Калтаса район территорийыште шке пашаштым сай палыше да уста пашаеҥ-влак тыршат, – ойла ГИБДД пӧлка вуйлатыше Вадим Владимирович Щекатуров. – Чыланат аттестацийым эртеныт. Корно-патруль службын ныл инспекторжо, корно-патруль службын старший инспекторжо, корно толкынышто безопасность шотышто кугыжаныш инспектор, корно толкын безопасностьым пропагандироватлыме шотышто инспектор, административный законодательстве шотышто инспектор.
Вадим Владимировичын мутшо почеш, коллектив келшышан, профессиональный улеш. Конешне тыште вуйлатышын надыржат уло, тудын устан вуйлатен моштымыж деч ты паша шога. Тачысе кечылан ГИБДД пӧлкан пашажым тыгай цифр-влакым ончен аклаш лиеш. Тений ноябрь тылзе тӱҥалтыште районышто 4676 утла осал пашам тӱжваке лукмо, тидын годым корнышто коштмо правил-влакым пудыртымаш – 373. Йӱшӧ вуя автомобиль дене кудалыштше 104 водительым кучымо. Тышеч 13-шо угыч логалын, нуно уголовно мутым кучаш тӱҥалыт. Тений индеш тылзылан корно-транспорт проишествийыш 122 гана лекме. Тидыже эртыше ийысе дене таҥастарымаште механический ДТП-влак шукемыныт.
Корнышто корно-патруль службын инспекторжо-влак кугу рольым модыт. Тиде Евгений Шипаев, Александр Сайтаев, Владислав Гафутдинов, Ильдарис Шакиров да ДПС-ын старший инспекторжо Денис Савитов. Нуно еҥ-влакын илышыштым аралымаште вуйын шогат. Текшырышан, йӧным муын моштышан, ушан-шотан да физически ямде улыт.

Эше тидым палемдаш кӱлеш, корно-патруль служба инспекторын профессийже тыглай огыл. Вет пашаштат тӱрлӧ случай-влак лийыт.
– Аварийлаште сусыр деч айдемын верыштак колымыжым ужаш поснак неле, – ойла шке пашаж нерген Вадим Владимирович. – А кунам икшыве-влак колат, поснак шӱм-чон коржеш. Сандене ты сферыште чыланат огыл пашам ыштен кертыт. ГИБДД пашаеҥлан шке пашажым шукташ чытымаш, вуйын шогымаш, уло кумыл дене ышташ, тыгак юридически ушан-шотан лийман.
Южик автомобилист-влакын ГИБДД-ын пашаеҥже-влак нерген ик шонымаш – лӱдмаш да келшыдымаш. Шукышт ты профессий коррупций дене кылдалтын манын шона. Туге гынат мемнан пашаеҥна-влак шке порысыштым чын шуктат, корнылаште порядкым аралат. Ты шотышто нунылан видеорегистратор-влак полшат. Тачысе кечылан правам пудыртышо еҥ дене кеч-могай контакт аудио- да видеозапись гоч мия. Видеорегистратор-влак патруль автомобильыште гына огыл, тыгак кажне пашаеҥын оҥыштыжо уло.

ГИБДД инспекторын пашаже моткоч кӱлешан. Нунын тыршымыштлан кӧра районышто ятыр осал паша тӱжваке луктылтеш. Пеш сай, мемнан пӧлкаште тыгай уста пашаеҥ-влак пашам ыштат. Тиде Сатаев Александр Борисович. Вольыкым шолыштмо осал пашам тӱжваке лукмыжлан МВД-ын Башкортостан Республикысе Министерствыже тудым палемден.
Тыгак Шипаев Евгений Юрьевичым палемдыме шуэш. Тудат корно толкын безопасность областьыште административный правам пудыртымашым тӱжваке луктын. Перспективный, опытан да спорт дене кылым куча. Савитов Денис Вениаминович ден Щекатуров Вадим Владимирович тений «Профессий шотышто эн сай – 2019» профессионал мастарлык шотышто конкурсышто пӧлкан чапшым араленыт. А тудыжо мемнан республикынан рӱдолаштыже эртен. Эше тидым каласаш кӱлеш, удан огыл. Нуно коктынат сай результат-влакым ончыктеныт да «Правовая подготовка» да «Огневая подготовка» номинацийлаште икымыше степенян Диплом-влак дене палемдалтыныт.
Районышто кажне кугыжаныш автоинспектор-влак нерген ме лач поро мут-влакым гына возен кертына. Лач нуно эрденат да кастенат постышто улыт. Нунылан куштылго огыл пашаштышт чытымашым гына тыланен кодына.