Калтаса ужара
+17 °С
Пылан
Все новости
Новости
18 Кылме 2019, 22:48

Овий поран (ойлымаш)

Тыште кугу пораным молан «Овий поран» маныт йодышлан вашмутым муаш лиеш.

Ик марий ялыште Овий лӱман кувавай илен. Теле жапыште ик касвелеш Овий кувавай пошкудыжо деке миен. «Пычкемшалтме жап марте изишак пошкудем дене юванен толам», – семынже Овий кувавай шоналтен. Лач тиде жапыште изишак мардеж кожганен. Пычкемшалташ тӱҥалме татыште Овий кувавай мӧҥгыжӧ тарвана. Тудо капкам лектын, изиш веле каен шукта – лӱшкышӧ поран толынат лектеш. Пеш виян пӧрдеммардеж да ончалаш лийдыме кугу поран тӱҥалеш. Овий кувавай кушкыла кайшашымат йомдара. Тудо, тыгай азап дене аҥырген, прогалыш логалеш. Прогал дене ошкылын, пакчашке лектеш.
Йӧршынак аҥыргыше. Овий кувавай пакчаште саташен коштын да вийже пытен, лӱм ӱмбаке сӱмырла. Вес кечынже поранат, мардежат изиш лыпланат. Овий кувавайын суртшо гыч тудым кычал лектыт. Вашке Овий кувавайын йоммыжым ял калык пален налеш. Тӱшка дене Овий кувавайын кылмен тӱҥшӧ капшым пакча мучашсе пече воктене муыт.
Тиде историй деч вара пеш кугу пораным «Овий поран» манаш тӱҥалыныт. Тыгай годым кеч-кӧ гынат тӱгӧ лектешат, пӧртыш пурен, пелешта: «Ж-ыж-ыж. Ывы-вы. Таче Овий поран толыны-с. Шӱлалташат, ончалашат ок лийы-с». Кызытсе жапыште тыгай азапым руш мут дене – ураган, шторм, смерч да моло семынат – маныт. А проста калыкем шке семынже каласен. Кидпаша дене чумырген шинчыше кокай-влак тидым икте-весыштлан ойленыт да чын лийшылан шотленыт. Мый нуным колыштынам да чын лийшылан шотленам.
А. Окмакин.