"Мокай" мут кушеч лектын?

Мокай мончаш олта гын, йӱштӧ вӱд дене мушкылт лектат да ӱпш дене аҥырген возат. Мокайын киндыже кермыч гай лиеш: шуын шуктен огыл, оваренат огыл, кӱынат огыл. Тыгай кинде пӱеш веле нерынчалтеш. Мокайын мелнаже калай лаштык гай лиеш: овармыжат, пушкыдылыкшат огеш лий.

Мокай ш¢ртым ш¢дыраш шинчеш гын, тудын шӱртыжӧ ик вере вичкыж, вес вер кӱжгӧ, ик вере лушкыдо, вес вере чот пӱтырымӧ лиеш. Тыгай шӱртӧ гыч «вузык-вузык» пиж але чулка лектеш. Мокайын шолтымо кочкышыжым мут дене каласен сеҥешат ок лий. Мокайын лӱмжӧ шочмо калыкем коклаште чотак шыҥен. Иктаж ӱдырамаш сомылым моштен шуктен огыл гын, тудлан чечас лӱмым пижыктен пуат: «Кай, чылт «мокай» улат-с. Тиде сомылым тыге ыштат мо. Ончал кузе ышталтеш». Мокай гай ӱдырамаш, очыни, чыла верыштат да чыла жапыштат лийын.

Тыглайлан огыл, тыгай л¢мдыш мут шарлен.

А. Окмакин.