ЧЫВЕ МОЛАН кеҥежым МУНЧЫМЫМ ЧАРНА?

Молан чыве эсогыл кеҥежым мунчымым чарна але шагалрак мунчаш тӱҥалеш? Тыште амалже ятыр. Тышечын шым эн тӱҥжым ончыктена.

Кенета волгыдо кече шагалемеш. Чывылан суткаште 12-15 шагат деч шагал огыл волгыдо кӱлеш. Телым да эше тӱжваке шуэн луктыда гын, вӱташте лампе-влакым вераҥдаш кӱлеш.

Южын температуржо утыждене ӱлыкшӧ але утыждене шокшо. Чыве телымат мунчымым ынже чарне манын, вӱтам ырыктыме шотышто шоналтыза. Мутлан, электровий дене ырыктыше ӱй радиаторым шындаш лиеш.

Ӱлыкшӧ вӱдыжгылык. Тыгай проблемым кораҥдышашлан вӱтам чӱчкыдын южтарыман. Но тыгодымак мардеж коштшаш огыл.

Стресс. Чывым ик вер гыч весыш кусарыме годым сурткайык чӱчкыдынак мунчымым чарна. Икмыняр кечым вучалтыза, у верлан тунемеш, да умбакыже чылажат сай лиеш.

Чын огыл пукшымаш. Сурткайыкым утыждене пукшаш ок келше, нормым эскераш кӱлеш. Нормым шотыш налаш огыл гын, мунчымым чарна. Тылеч посна чыве пеш вичкыж шӱман муным мунчен кертеш. Тидыже рационышто кальций ситы- дыме нерген ойла.

Талукын пагытше вашталтмаш. Тидым шке шотан стресс семынат ончаш лиеш. Южын температуржо вола, вӱдыжгылык вашталтеш, кочкыш вестӱрлӧ да молат. Адакат тыште жап гына полшен кертеш – чывылан тунем шуашыже жапым пуыза.

Ийгот. Чыве ийгот шот дене шоҥго гын, кок пачаш шагалрак мунча. Тиде амал дене нимом ышташ, сурткайыкым шыллан кучылташ веле кодеш.