Тыршыше ава да кидмастар

Ноябрыьын пытартыш рушарнян моткоч сай пайрем – Аван кечыже палемдалтеш. Кажне еҥын илышыштыже эн кӱлешан, эн ныжал да ласка айдеме – ава. Тендан газет страницыштыда мый шкемын авам Кумушбаева Ирина нерген каласкалынем.

Мыйын авам, Ирина Александровна, Амчемучаш ялыште шочын кушкын. Тыглай, кресаньык ешыште шым йоча кушкын. Тудын аваже ден ачаже, Ольга ден Александр ӱмырышт мучко колхозышто тыршеныт. Нунын тыршымыштым ужын икшыве-шамычат пашам йӧратыше кушкыныт. Кызыт мыйын кочам ден ковамын 22 уныкаже да 20 кугезе уныкаже уло.

Школым тунем лекме деч вара авам Йошкар-Оласе И. Палантай лӱмеш культура да искусство колледжыш тунемаш пурен. Тудо изинекак марла муро-влакым мураш йӧратен. Еш кугу лийын, окса ситен огыл, сандене авамлан тунеммыжым шолен, шочмо Амчемучаш ялышкыже пӧртылаш логалын.

Жап эртен. Изинекак пашалан тунемше авам, нимогай паша дечат лӱдын огыл. Ушкал фермыште доярке лийын ыштен, фермым вуйлатен. Ешым чумырен, ойырлен. Нимогай нелылыкым шотыш налде, авам куд икшывым шочыктен. Кызыт тудын дене кумытшо гына – Василий, Милена, Магдалена – илат. Амчемучаш ялыште кугу пӧртым чоҥымо. Ешын шке озанлыкше уло. Ава деч примерым налын, ме, йоча-влак, чыла шотыштат тудын гай лияш тыршенна. Тудым тургыжландараш огыл манын, сайын тунемынна, тудлан кеч-могай сомылым ышташ полшенна. Чыла ыштен моштена: ушкалымат лӱштена, сӧсна игымат пукшена.

Авам моткоч кидпашам йӧрата, поснак паласым куаш. Изинекак тудо мотор палас-влакым куаш шонен, но миен лектын огыл. Икмыняр ий эртымеке, пошкудо Очий ковайлан кӧра, шукертак шонен коштмо шонымашыжым авам илышыш шыҥдараш тӱҥалын. Ожнысо станок дене тудо моткоч мотор паласым пидеш. Шке пашажым тӱрлӧ район мероприятийлаште ончыкта. Кунам авана шыргыжеш, тудын шинчаже куан тул дене ылыжеш, мыланна моткоч сай.

Аван пайремже вашеш, тыланет, йӧратыме авайна чыла сайым гына – тазалыкым, пиалым тыланыме шуэш. Эре тыгаяк весела, тыршыше ава да кова лийын код.

Икшывет-влак лӱм дене К. Мурсакаева.