Краснохолмский села гыч Светлана Бормотован лу йочаже

Краснохолмский села гыч Светлана Бормотова шкенжын илышыжым йоча-шамычлан пӧлеклен. А нунышт луын улыт: кокытшо шкенжын да кандаше ончаш налме

Материалын подзаголовкышто мом серымым ончаш огыл гын, Бормотовыт тыглай шуко икшыван еш, тудын шке проблемыже, тургыжланымашыже уло. Еш оза – Алексей Юрьевич, газ озанлыкыште тырша, Светлана Леонидовна – йоча-шамычым воспитатла. Селан у микрорайоныштыжо нуно кугу, кок пачашан пӧртым чоҥеныт. А эн тӱҥжӧ – тушто шокшо еш шӱлыш озалана. Айдеме еш деч посна, тиде вож деч посна пушеҥге гай. Ик приютат, ик йочапӧртат икшывылан ешым вашталтен ок керт. Бормотовмыт кандаш йочалан шкеныштын шокшыштым да йӧратымашыштым пуэныт. Тидыже куандарыде ок керт.

– А кушеч чыла тӱҥалын? Кузе те йоча-влакым ончаш налаш лийында? – йодым мый Светлана Леонидовна деч.

– Ме лӱмын нимом ыштен огынал, тыге миен лектын, - каласкала тудо. – Мый эше школышто тунеммем годымак кугу ешым, шуко икшывым шочыкташ шоненам. Марлан лектынам, Андрей шочын, ик жап гыч Алена. Тольык вот организмем лунчырген, тиддеч вара врач-влак мыланем азам шочыкташ чарышт. Икшыве-шамыч кугемыныт, Андрей пытартыш класслаште тунемын, Аленат тудым поктен. Пелашемлан йоча пӧрт гыч ӱдырым але эргым ончаш налаш темлышым. Ончыч тидлан тудо тореш ыле. Тиде жапыштак пошкудына-влак эргыштым йомдареныт, тиддеч вара ӱдырым ончаш налыныт. Тиде ӱдыр мемнан Алена дене келшаш тӱҥалын, чӱчкыдын мемнан пӧртыштӧ модыныт. Мый пелашемлан, ончо, тудо тыланет иктаж-мо дене мешая мо, манын йодым. Икманаш, мый пелашемым сӧрвален сеҥышым. Пошкудына-влак адресым пуышт, кушко да кузе йодын мияш умылтарышт. Ме Сарапул оласе йоча приютыш кайышна. Икмыняр гана тушко миенна, онченна, ойырен налынна. Тыге мемнан ешышкына Настя логалын, тунам тудлан 8 ий лийын, кызыт 20 ий. Уфа олаште торговый техникумым тунем лектын, йӧратыме рвезыж дене Санкт-Петербург олаште илат. Пашам ыштат, пачерым айлен илат.

Бормотовмытын шке икшывышт-влакат посна илат. Кугырак Андрей эргышт ешым чумырен, Георгий эргым ончен-кугемдат. Алена Санкт-Петербург, Уфаште пашам ыштен, кызыт Нефтекамск олаште «Урал» торгайыме рӱдерыште бариста лийын ышта. Тиде пашалан Ижевск олаште тунемын. Рвезе дене вашлиеш, но ешым чумыраш огыт вашке.

– Кызытсе самырык-влакын еш нерген шке шонымашышт уло, – палемда Светлана Леонидовна. – Паспортыш штампым шындаш огыт вашке.

Кызыт ача-ава дене шым икшыве ила. Нуно чыланат школышто тунемыт. Кажныжын шке илыш историйже. Лач нуным ик пӱрымаш гына – нуно изинекак еш деч посна кодыныт, приютышто иленыт, а вара у ешым муыныт – ушен шога. Тыгай еш нунылан Бормотовыт еш лийын.

Ешыште, мутлан, Сергей, Аня да Семен ик ача-ава деч улыт, Егор ден Юлят иза ден шӱжар улыт. Настя деч вара Бормотовмыт Сергей ден Аням налыныт, нунылан тунам 8 да 6 ий лийын, кызыт Сергейлан латшым ий, Анялан – латвизыт. Нунын изирак Семен шольышт нунын деке варарак ушнен. Ондак тудым вес ешыш ончаш налыныт улмаш, но тиде еш шаланен. Кунам Семен уэш приютыш логалын, Бормотовмыт шуко шоныде тудым шкешт деке конденыт.

– Ик жап гыч мый Нефтекамск оласе «Ангел-подорожник» порылык организацийын филиалже дене кылым кучаш тӱҥальым, – каласкала Светлана Леонидовна. – Ме порылык акций-влак дене чӱчкыдын йоча приютлаште, школ-интернатлаште, шоҥго-влак илыме пӧртлаште лийынна. Уфаште гын тиде организаций бомж-влакланат полышым ончыкта. Настя деч вара моло икшывем-влакым мый лач приютлаште тыгай акций-влакым эртарыме деч вара муынам. Ме кажыныжым манаш лиеш ончыч каныш кечылан гына шкенан деке налын улына. Тыге моло икшыве-влак нунын деке эркын тунемыныт. Адаптацийлан, икте-весе деке тунем шуаш жап кӱлеш. Чыла икшыват воспитанный лийже, сай образованийым налже манын, Светлана Леонидовна чыла ышташ тырша. Школ деч посна чыланат тӱрлӧ кружокыш коштыт, музыкальный школышто тунемыт. Юля ден Егор фортепьяно, баян дене шоктат. Школ оркестрыште Егор балалайке дене шокта. Конкурслаште лауреат диплом-влакым налыт.

Айгуль сӱретлаш искусство школыш коштеш. Никита футболист лияш шона, тудо кызыт нылымше классыште тунемеш.

Светлана Леонидовна дене ме еш фотосӱрет-влакым ончышна. Шем теҥыз, Сочи, Башкирийысе эҥер ден ер-влак, Екатеринбург, Ижевск… Бормотовмытын автомобильыштат шым веран. Садыгак чыланат тушко огыт шыҥе. Шем теҥызыш черет дене кок ий почела миеныт. Вес маршрут денат тыгак. Пӧртымат вет ончаш кӱлеш. Сандене тиде пашам кугырак икшыве-влак шуктат.