Эргыжын геройлыкым ончыктымыжлан кӱкшӧ награде

Тугай еш-влакым палемденыт, кудыштын икшывышт республикынам чапландареныт да геройлыкым ончыктеныт. Кугыжаныш наградым Башкирий гыч ныл еш налын: Калтаса район Калмиямучаш ял гыч Любовь ден Мильсон Алексеевмыт, Туймаза район гыч Кумирихан ден Александр Кирсановмыт, Хайбулла район гыч Булат Бикбов, Шаран район гыч Людмила ден Анатолий Гараевмыт. Лач нине ешлаште лӱддымӧ да герой подвигым ыштыше еҥ-влак шочын кушкыныт.

Любовь Никитична ден Мильсон Алексеевич келшен да икте-весым умылен да йӧратен 45 ий иленыт, кок икшывым: Юрий эрге ден Людмила ӱдырым ончен кугемденыт. Тыглай ялысе еш лӱддымӧ айдемым ончен кугемден. Палемдаш кӱлеш, кугу буква дене Айдемым. Алексеевмытын эргышт служебно-боевой задачым шуктымыж годым Чечен Республикыште колен, тудым Мужество орден дене палемдыме. Район калык Юрийым правам аралыше органын чын пашаеҥже семын палат. Тудо шке пашажым йӧратен, пуымо мутшым кучен. Тудо ачаж ден аважлан ӱшанле эҥертыш лийын, сай йолташ, сослуживец, профессиональ порысшылан ӱшанле пашаеҥ лийын. Теве тыгай эргым ончен кугемденыт Любовь ден Мильсон Алексеевмыт.

– Тыгай пайремыш ӱжмыштлан куаненна, – каласкала пайрем нерген Любовь Никитична. – Конешне, тыгай медальым шинчавӱд дене налаш моткоч неле. Но эргынам пӧртылташ ок лий. Кугыжанышын мыланна тӱткылыкым ойырымыжлан тау.

Любовь Алексеевнан мутшо почеш, Аван кечыже вашеш нунылан кугу пайремым ямдыленыт. Ик кечылан нуно сурт сомылым монденыт да тудым лач пайремлан гына пӧлекленыт. Нунылан лӱмын залын фойештыже творческий площадке ден мастер-класс, консультаций ден психологический экспресс-диагностикым ямдыленыт. Уфа гыч нуно сай кумыл дене пӧртылыныт.

Кӱкшӧ наградым кучыктымаште Юрийын ешыжат лийын: Елена ватыже, Валентина ӱдыржӧ да Алексей эргыже. Алексей ачажын кышаже почеш каен. Кунам коваж ден кочажым саламленыт, нунын ӱмбаке шочшышт кугешнымаш да йӧратымаш дене онченыт.