Писатель Павел Брычков – «Мый Чомарын шочшыжо улам»

1950 ий февральыште Чомар пашазе поселкышто 44 ияш Брычков Алексей Фролович да тудын ватыже Веран ешыштышт нылымше эрге шочын. Тудлан Павел лӱмым пуэныт. Ешыште тыгак 18 ияш Валентина, 13 ияш Антонида да 10 ияш Алексей кушкыныт. Еш пакчам шынден, вольыкым, ушкал ден презым кучен.

Еш оза верысе чодыра пунктышто тыршен. Кум ий гыч еш Чомар гыч Пермь кундемыш, ик леспромхозыш, илаш куснен. Тушто мемнан геройнан йоча жапше эртен. Кандашияш школым тунем лекмеке, тудо Нефтекамскыш толын, 2 №-ан кыдалаш школым тунем пытарен. Вара Казань оласе авиационный институтышто шинчымашым поген, тудым тунем лекмеке, распределений почеш, Омск оласе моторостроительный конструктор бюрошко логалын, тушто авиационный двигатель-влакым испытатленыт. Инженер пашам литератур творчество дене келыштарен, 1989 ийыште А.М. Горький лӱмеш Литератур институтым тунем лектын. «Время» газетын тӱҥ редакторжо лийын ыштен.

«Потерянный страх» икымше ойлымашыже «Старт» сборникыште 1991 ийыште лектын. Тыгак «Москва», «Сибирские огни», «Урал», «Богатство Сибири», «Литературный Омск», «Иртыш» альманахлаште савыктыме. Павел Алексеевич «Отпор» ден «Полуденный зной» роман-влакын авторжо. Нуным 1991 да 1999 ийлаште савыктен лукмо. Нине историй сынан роман-влаклан мемнан землякна 2005 ийыште Д.Н. Мамин-Сибиряк лӱмеш всероссийский литератур премийын лауреатше лийын. Премийым 2002 ийыште, руш литературын классикшын 150 ияш юбилейже вашеш пуаш тӱҥалыныт. Тыгак тудо М.С. Шангин да А.А. Дунин-Горкавич лӱмеш премий-влакын лауреатше улеш. Нине историй роман-влак деч посна П.А. Брычковын моло проза ден очеркше-влакат савыкталтыныт. 1991 ийыште тудо Россий писатель ушемын членже лийын.

Брычковмыт Надеждин ялыште иленыт. Кызыт Российын тӱрлӧ кундемыштыже илат. Надеждин ялыште шочшо Брычков Анатолий Сергеевич философий науко доктор, профессор, кызыт Смоленск олаште ила. Брычковмыт Нефтекамскыштат илат. Нуно чыланат родо-шочшо улыт. Нунын вожышт Мордвиновка (Кадреково), ончычсо граф адмирал Мордвинов Николай Семеновичын вотчиныж гыч тӱҥалын.

Р. Шакиртов,