Поро шӱм-чонан улмыланда тау

3 декабрь – Инвалид-влакын тӱнямбал кечышт. Тиде пайрем огыл гынат, мыланна, мемнан ешлан моткоч кӱлешан кече.

Тиде кечын Элеонорам Калтаса селасе РДК-те эртыше концертыш ӱжыныт, тыште тӱткылык да порылык шӱлыш озаланен. Омсам пурымаш гычак мыланна поро еҥ-влак полышым ончыкташ тӱҥальыч. Тыште ме «Особенные дети» почеламутым лудынна да уло кумылын концертым онченна. Тыгай мероприятийыш логалмыланна Лилия Матвеевалан кугу таум каласынем.

Тыгак 5 декабрьыште Нефтекамск оласе Самырык-влакын полатыштышт поро йӱлашкак пурышо «Аллея звездочек» мероприятий эртен. Тудым Нефтекамскысе реабилитаций рӱдер (вуйлатыше Каюмова Клара Галеевна) организоватлен. Тиде гана «аллейыште» 36 у шӱдыр чӱкталтын. Тиде район, ола, республике, Всероссийский, тӱнямбал конкурслаште сеҥыше-влак. Нунын кокла гыч, ик шӱдыр мемнан Элеонора лийын. Тудлан йоча талант пайрем участникын дипломжым кучыктеныт. Ме уло кумылын йолташна-влак дене мутланышна, икманаш, пайрем мыланна моткоч келшыш.

Ме шкенан икшывына-влакым 3 декабрь дене огына саламле. Ме нуным лач ӧндалына да тазалыкым, кужу ӱмырым тыланен кодына. Мемнан кидыште тыгай йоча-влак поснак пиалан лийшаш улыт, нунылан куаным пӧлеклаш тунемман.

Мемнан илышыште участвоватлыше чыла еҥлан кугу таум каласена. Мемнан туныктышына Л.А. Пакриевалан тау, тудо кеч-кунамат поро мут-влакым муэш да волгыдо шыргыжмашыж дене чыла ойгым поктен колта.

Ме чыламат шушаш У ий дене саламлена да илышыштыда сайым гына тыланен кодына. Тек шушаш ийыште поро пашам ыштыше еҥ-влак шукырак лийыт.

С. Канданова, Элеоноран аваже.