У ий могай пушан?

Иман кушкыл укш дене дене келыштарыме аршаш тутлын пушланыже манын, ӱстембаке шындыме деч ончыч тудым ик-кок шагатлан балконыш але пӧртӧнчык луктын шындыза – йӱштӧ гыч пуртымо лӱс палынак виян ӱпша. Искусственный кожымат «ылыжтыза». Тидланже нулго ӱй дене нӧртымӧ пушкыдо куэмым кожын ӱлыл укшышкыжо сакыза. Пайрем шӱлышым пуртымыж деч посна нулго пуш эше тазалыкым пеҥгыдемда.

Апельсин але мандарин шӱмым вичкыж кӱртньывоштырыш кередыза да олтымо батарейыш кучыктен сакыза. Шокшышто емыж-саска шӱм, мутат уке, писын кошка, но путырак виян пушым луктеш.

Гвоздикым кередыман апельсинат тулын пушлана. Гвоздике ден апельсин икте-весыштлан моткоч келшен толыт, пырляште эшеат виян, эсогыл глинтвейнла ӱпшат.

Корице пушат уда огыл. Тудо лыпландарыше виян улмыж дене ойыртемалтеш. Илыме верыште корице пуш озаланыже манын, кече еда булкым кӱэшташ огеш кӱл. Тидланже, кугужак огыл стакан йыр корице паҥгам кучыктен, шкешотан сортайолым ыштыза. Сорта тул стаканым ырыкта, да ты шокшо пушым луктеш. Тылеч посна тыгай сортайол шке дизайнже дене ойыртемалтше да оҥай лиеш.