Все новости
Новости
7 Пургыж 2020, 20:20

Сарым Сталинград воктене тӱҥалын да Берлиныште пытарен

Армяниново ял гыч тыглай рвезе Константин Армянинов Кугу Отечественный сарын фронтлаштыже лӱддымылыкым да патырлыкым ончыктымыжлан III-шо степенян Слава орден, «За отвагу», «За освобождение Варшавы», «За взятие Берлина», «За победу над Германией в Великой Отечественной войне 1941-1945 годов» медаль-влак дене наградитлалтын. Армянинов Константин Демидович 1923 ийыште Армяниново ялыште шочын. 20-шо ийла покшелне Армяниновмыт еш Холодный Ключ хуторыш илаш куснен. Ныл классым тунем пытарен. Плугарь лийын тыршен, Келтей МТС-те трактористлан тунемын, тудым пытарымеке, «Серго» колхозышто пашам ыштен.


Сар тӱҥалын. Тракторист-влакым вигак сарыш налын огытыл, 1942 ийыште броньжым сниматлат да фронтыш колтат. Минометчик-влак курсышто куд тылзе тунеммеке Армянинов Сталинград фронтыш логалеш.


Сталинградым аралыше салтак, вара тудо Украине, Белоруссий, Польша территорий-влакым утарен, Берлин марте шуын.


Стрелковый полкын минометчикше поснак Днепрым вончымо годым ойыртемалтын.

– Мемнам, салтак тӱшкам, – шарнен ойлен ончычсо фронтовик, – йӱдым тушман серыште волтен коденыт. Ме, мемнан салтак-влак толмешке, плацдармым кучышаш лийынна.


Днепрым вончымо годым операцийым сайын шуктымылан, полкын командирже Быковлан Совет Ушемын Геройжо лӱмым пуэныт, а мемнан землякна Армяниновым III-шо степенян Слава орден дене палемденыт.

Кредалмаште лӱддымӧ минометчик нелын сусырген. Наградым тудлан госпитальыште кучыктеныт. Сар гыч Константин Демидович 1947 ийыште пӧртылын. Сюткин Иван Трофимовичын Надя ӱдыржым марлан налын. Надя – Совет Ушемын Геройжо Петр Иванович Сюткинын шӱжарже.


Сар деч вара колхозышто тыршен, вара Большой Лог ялыш илаш кусненыт, тыште вольыкым погымо шотышто заготовительный пункт лийын. Тыште тудо приемщик лийын тыршен.


Арлан нефтепровод управленийым чоҥаш тӱҥалмеке, нуно Кӧтерем селашке илаш кусненыт, АРНУ-то слесарь лийын ышташ тӱҥалын.


Нина дене кок эргым ончен куштеныт. Петр эргыже Кӧтерем селасе «Нефтяник» ДК вуйлатыше лийын тыршен.


В. Иванов.