Кажне икшыве пиалым конда – тыге шотлат Калмиямучаш ял гыч вате-марий Исаевмыт

Исаевмыт еш историй эше 13 ий ончыч тӱҥалын, тунам 16 февральыште Вероника ден Олег сӱаным модыныт. Икте почеш весе икшыве-влак шочыныт – Ринат, Рамиль, Ильнур, Дамир. Кугырак эрге-влак Павасола школышто тунемыт, изирак Дамирчик эргышт Калмиямучаш йочасадыш коштеш. Эрге-влак шке ача-аваштым сеҥымашышт дене куандарат. Ринат спорт дене кылым куча, тудо республикыште ече дене таҥасымаште призер лийын, Уфа олаште тӱҥ елкыш миен.

Вероника, моло ӱдырамаш-влак семынак, ӱдырым шочыктынеже лийын. Кузе нуно пелашышт дене пеҥгыдын ойлат, ешыште икшыве шуко ок лий. Тений 10 февральыште нунын келшен илыше шуко икшыван ешышке куан толын – ӱдырышт шочын. Изи йочам Виктория манын лӱмденыт.

Вашке ты ешым эше ик куанле увер вуча – тений нуно Краснохолмский селаште пӧртым чоҥен пытарат, тугеже у пӧртыш илаш куснат. Кугу ешлан кугу да волгыдо пӧрт кӱлеш. Пӧртым чоҥаш Исаевмытлан кугыжаныш деч окса субсидий ойыралтын.

Ты кечылаште Олег ден Вероника Исаевмыт шке ӱдырыштын икымше документышым налыныт. Аза шочмо нерген свидетельствым кучыктышыла, Калтасасе ЗАГС пӧлка вуйлатыше И.В. Валеева ача ден авам шокшын саламлен.

– Талук тӱҥалтыш гыч ме шочшо 19 азам регистрироватленна, – каласен Ирина Владимировна. – Тек Калтаса районышто шукырак аза шочшо, вет кажне икшыве – тиде ешыште кугу куан да пиал.

Шуко икшыван ава-влак деч ятыр гана колынам: икымше, вара кокымшо икшыве дене гына нелырак лиеш, молыштым ончаш да кушташ куштылгырак. Тыгак Вероника Исаева ойла. «Вет кажне гана пиал, а тудыжо кажне икшыве дене кугемеш», – ойла тудо.

Тек тиде келшен илыше ешыште пиал шукырак лиеш, а шонымашышт шукталтеш.