Вашке полыш вашкерак толжо манын Калтасаште мом ыштат?

Пытартыш жапыште медициныште ятыр вашталтыш лиеденак шога. Республикыште вашке полыш службым реорганизоватлаш тӱҥалыныт. Инноваций да вияҥме перспективе нерген мыланна Калтаса эмлымверын тӱҥ врачшын пашажым шуктен шогышо Ренат Яудатович Шарифьянов каласкалыш:

– Калтаса районышто илыше пагалыме калык! Мемнан районышто вашке полышым ончыктымо шотышто мый тендам кӱлешан увер дене палдарынем.

Нефтекамск оласе ГБУЗ (эмлымвер) пелен Нефтекамск ола, Калтаса, Кӱшыл Татышле, Янаул да Дӧртӧльӧ районласе вашке полыш пӧлка-влакым ушен ик межмуниципальный вашке полыш пӧлкам организоватлат. Тидын годым Калтаса эмлымверыште вашке полыш пӧлка ок петырлат.

Нефтекамск округысо вашке полыш пӧлкам иктыш ушымын цельже:

– Башкортостан Республикысе ЕДС-ын (единая-диспетчерская служба) пашажым организоватлен колташ; Нефтекамск округышто илыше калык деч «03», «103», «112» номер дене пурышо вызов-влакым приниматлаш тӱҥалыт;

– СПМ диспетчер-влакын вызов-влакым обрабатыватлыме жапыштым кӱчыкемдаш да медицине полышым вашкерак ончыкташ йӧн лиеш.

Калтаса районышто илыше калыклан вашке полышым тыгак вашке полышын кок бригадыже ончыкташ тӱҥалеш, нунышт Калтаса ден Краснохолмский селалаште верланеныт.

Вашке полышын штатше ок вашталт.

Кунам вашке полышын кок бригадыжат вызовышто лиеш, тыгодым Калтаса районышто вашке полышын эше кок резерв бригадыже лиеш. Кӱлеш годым вашке полыш Нефтекамск, Янаул ола-влак, Краснокам район гыч толын кертеш. Икманаш, тендан илыме верда кушко лишкырак, тушеч вашке полыш толеш.

Сандене, СПМ-ым иктыш ушымаш мемнан районлан пайдале лиеш. Йодыш-влак лектыт гын, поликлинике вуйлатыше Фаткуллин Ильшат Ильдаровичлан (8347790) 4-02-17 номер дене йыҥгыртен, чыла пален налын кертыда.