Йӧратен моштышо еҥ

Литератур псевдонимже Алексей Мурзашев. Тудын могай айдеме улмыж нерген произведенийже-влак гоч умылаш лиеш. Тудо ӱмыржӧ мучко шке шочмо-кушмо вержым, шке ял калыкшым, родо-шочшыж ден пошкудыжо-влакым уло чон дене йӧратен моштен. Уло чонжо дене шке ял калыкше верч тургыжланен. Йӧратен моштышо еҥ лийын.

Писатель паша неле паша. Пеш шуко вийым да жапым налеш. Туге гынат писатель шке ешыжланат жапым ойырен. Сания Ахмедьяновна пелашыж дене пырля кум икшывым ончен кугемденыт. Чылаштланат кӱшыл образованийым пуэныт. Аркадий эргыже физика-математике науко доктор улеш. МАРГУ-то общий прикаладной физике кафедрым вуйлата. Татьяна ден Таисия ӱдыржӧ-влак туныктышо паша дене шке илышыштым кылденыт. «Тудо сай ача лийын, мемнам йӧратен, мемнан дене модаш жапым муын, пырля чодырашке поҥгым погаш, колым кучаш коштынна. Кузе тунеммынам текшырен. Тудо мемнан верч тыршен. Мыланна эре жапым муын, кеч писатель паша куштылго паша огыл гынат», – воза Татьяна ӱдыржӧ.

Алексей Мурзашев писатель пашажым 1949 ийыште Эльян педучилищыште тунеммыж годымак тӱҥалын. «Мыйым возаш марий йылме ден литературым туныктышт Иван Батырович Батыров кумылаҥдыш», – ойлен писатель.

Ятыр произведенийжым шочмо Тӧлдӧ ялжылан пӧлеклен. – «Тӧлдӧ» роман, «Кугезе сугынь» повесть, «Пӧтыр веҥе» повесть, «Серка» повесть, «Мланде пуш» ойлымаш, «Кӧгерчен» повесть да молат.

Чыла тидым шке ял калыкше нерген возен. Шочмо ялжым уло кумылжо дене пагален.

Тӧлдӧ ял калыкат шке ял писательжым порын шарнен илаш тӱҥалеш да кушкын толшо тукым тудын произведенийже-влакым уло кумылын лудаш тӱҥалыт манын ӱшаныме шуэш.

Э. Пазугутова.