Тиде школышто келшен илыше да цельыш шуаш тыршыше туныктышо-влак пашам ыштат

Лу ий ончычсо жапым шарналтен, кунам школым пайрем шӱлышыштӧ почыныт, ме, Тӧлдӧ ялсовет администраций вуйлатыше Вадим Пазугутов дене школышко ончалаш лийна…

Школын педколлектившым ик классыште вашлийна. Туныктышо-влак ала-мом пеш рӱж каҥашеныт. Ала шушаш школ мероприятийым, ала эше иктаж-мом. Ме нунын коклашке ышна пуро. Кажне йодышым пеш тӱткын каҥашымым ужын, тыште коллективизм, творчество шӱлыш озаланымым ме шижна. Чакныдымаш, тыршымаш шомак-влак нунылан тыглай мут гына огыл улмаш. Тидым нунын сеҥымашышт гыч ужаш лиеш. Мутлан, индешымше класыште тунемше Никита Исинбаев, Камилла Исликаева шочмо йылме дене «Пою мою республику» республике конкурсышто икымше верым сеҥен налыныт (вуйлатыше Юлия Сапиевна Исликаева). Тыгак информационный технологий дене «ИКТ в творчестве педагога – 2019» район конкурсышто туныктышо-влак Алефтина Александровна Якупова (физика) ден Юлия Сапиевна Исликаева (марий йылме) кокымшо ден кумшо верым налыныт.

Тыгай сеҥымаш спискым умбакыжат шуяш лиеш. Тиде школышто мемнан элысе наукышко изи огыл надырым пыштыше ученый, просветитель-влак тунемыныт. Тиде – педагогике науко доктор, профессор, академик П. А. Апакаев, технический науко кандидат В.Н. Умутбаев. Тудо Башкортостан Республикын икымше президентше М.Г. Рахимов дене пырля ик курсышто тунемын. Москваште илыше-влак И.И. Паюковым пеш сай палат. Тудо медицине областьыште 10 научный патентын авторжо улеш. Тунемше ден туныктышо-влак нунын дене кугешнат.

Кузе ме пален нална, школышто интернат пашам ышта. Тыште У Оръямучаш ден Васильевке ялла гыч тунемше-влак илат. Йоча-влак дене воспитатель Р.И. Тимкина пашам ышта.

Вот тыгерак тырша пашам йӧратыше да келшен илыше, цельыш шуаш тыршыше Тошто Оръямучаш школын коллективше. Нунылан школ ден тунемше-влак эн шерге улыт – илыш, ӱшан да ончыкылык. Вет нуно пеш сай умылат: школ ок лий гын, нимогай ончыкылыкат ок лий, элнан картше гыч воктен верланыше ял-влакат йомыт.