Эре тунемман да шинчымашым пойдарыман

Айста нунын дене палыме лийына. Ильнара Садикова 3 №-ан Краснохолмский кыдалаш школышто 10 классыште тунемеш. Тудо сай тунемеш веле огыл, тыгак сӱретла, фортепиано дене шокта, креативный кидпашам йӧрата, имньым кушкыжын кошташ тунемеш. Школ радион передачыж гыч ме пален нална, Киябак тичмаш огыл кыдалаш школын 9-ше классыште тунемше Милена Асылбаева куд ий «Шонанпыл» ДДТ-ын «Фантазия» куштымаш коллективыш коштеш, лапта дене модаш йӧрата. Пушкинын образше, музыка, мыскара 1 №-ан Краснохолмский кыдалаш школышто 8-ше классыште тунемше Гузель Гильмалетдиновалан шкеж нерген ойлаш полшен. Тудо музыкаль школым сай тунем лектын, спорт дене кылым куча да волонтер пашам шукта. Павасола кыдалаш школ гыч 8-ше классыште тунемше Владилена Тамиева шке визиткыштыже йомакысе мотив-влакым кучылтын. 2 №-ан Калтаса кыдалаш школышто 8б классыште тунемше Гульназ Гибадуллина кокымшо класс гыч 5-лан гына тунемеш, кушташ йӧрата, тудын шонымашыже уло – хореограф лияш да шкенжын куштымаш школжым почаш. Школ телевиденийын сюжетше 1 №-ан Калтаса кыдалаш школышто 9-ше классыште тунемше Ксения Чукавинам ончыктен, а Кӧтерем кыдалаш школышто 10 классыште тунемше Елена Воложанина нерген тудын йолташыже-влакын видеороликше гыч пален нална. Марий Мераҥ тичмаш огыл кыдалаш школ гыч 8-ше классыште тунемше Анастасия Шамыкаева сай тунемеш веле огыл, кларнет дене шокта, мура, кушта, тудо эше школышто куштымаш ансамбльым вуйлата.

Презентацийыште шукым ужаш лийын, туге гынат кажныже шке школжо, туныктышыжо, йолташыже-влак нерген йӧратымаш дене ойлен.

«Талукын тунемшыже – 2020» район конкурсышто 3 №–ан Краснохолмский школын тунемшыже Ильнара Садикова сеҥен.
Мыйын шонымаште, сеҥалтдыме уке, кажныже ты конкурсышто сеҥен кертын.

Икшыве-влакын шонымашышт шукталтеш манын ӱшаныме шуэш. Вет районышто эн сай тунемше-влак тудын у историйжым ыштышаш улыт.

С. Аркадьева.