Кужу жап пырля илыме секретышт нерген Калтаса села гыч вате-марий Гафаровмыт ойленыт

Элыште коронавирус пандемий дене кылдалтше ситуаций кужу жап пырля илыше вате-марий-влакым чапландарымаштат шке кышажым коден. Ты пайремым ик жаплан шеҥгелан кодымо. Россий кече деч ончыч юбиляр-влак деке район администраций вуйлатышын алмаштышыже Е.А. Алексеева да Калтаса районысо ЗАГС пӧлка вуйлатыше И.В. Валеева толыныт. Келшыше чыла мерым текшырыме. Елена Анатольевна вате-марийым шокшын саламлыш да Саламлымаш адресым, Башкирий вуйлатыше Радий Хабиров деч пӧлекым кучыктыш.

Самырык годсо жапын ийлаж дене изирак экскурс нунын йӧратымашыштын, шӱм-чон шижмашыштын историйышт нерген пален налаш полшыш. Вате-марий пырля тунемме йолташышт Анастасия Васильевна гоч палыме лийыныт. Тудо армий гыч гына толшо Марат Назибовичлан каласен: «Пеш сай да мотор ӱдыр уло, мый тыйым тудын дене палыме ыштем». Нуно Калтаса быткомбинатын ургымо цехышкыже толыныт, тыште Анастасия Васильевна ургызо лийын тыршен. 8 Март деч ончыч палыме лийыныт. «Ик гана мӧҥгӧ ужатыш», – шарналтен да шыргыжалын каласыш Анастасия Васильевна.

1969 ий июньышто сӱаным модна, официально каласаш гын, мужырнам 1970 ийыште пеҥгыдемдышна, ялсоветыште возалтынна.

Илыш шке черетше дене каен – тургыжланымаш, икшыве-влак шочыныт – кок эрге Марсель ден Игорь. Вате-марий шке эргыштлан пример лияш тыршеныт, пашалан туныктеныт. Ынде кажныжын шке ешыже, йӧратыме пашаже уло. Кызыт коча ден кова уныка-влаклан куанен илат – Гафаровмытын нунышт визыт.

«Икте-весыдам умылаш тыршыза», – каласыш Анастасия Васильевна, кунам мый пиалан ешым кузе арален кодаш манын йодмем годым.

– Мыйын шонымаште, кунам тый ешым чоҥенат да икшыве-влак шочыныт гын, тый нуным аралышаш улат, – ойла Анастасия Васильевна. – Чытымаш, пагалымаш, икте-весым умылымаш да проститлаш – тиде эн ончылно лийшаш. Мемнан пырля 50 ий илыме жапыште чылажат лийын. Неле, шӱлыкан жап-влакат лийыныт, туге гынат ме чыла чытен лектынна. Икте-весыланна, икшывына-влак верч.

Пел курым пырля илат гынат, Гафаромыт икте-весышт коклаште шокшым да волгыдо шижмашым арален коденыт, а тидыже – ик эн тӱҥ. Тыгай кужу илыш корным эртымеке нуно икте-весыштлан каласен кертыт: «Тау тылат, воктенем улметлан…».

***

Россий кече деч ончыч эше кок мужыр – Краснохолмский села гыч Гильмутдиновмыт да Кӧтерем гыч Дорофеевмыт саламлымашым налыныт. Нунын нерген ме газетнан лишыл номерлаштыже ойлена.