Баянист лияш тудын призванийже

Новоселов Владимир Николаевич шке илышыжым музыка искусствылан пӧлеклен

Кунам айдеме йӧратыме пашажым ышта, тудо пиалан улеш. Калыклан пайремым пӧлеклаш, шке искусство дене изимат, кугымат куандараш, лишыл еҥ-влакым уло кумыл дене йӧраташ – шке илышыжым музыкылан пӧлеклыше еҥын илыш позицийже тыгай. БР культурын сулло пашаеҥже Новоселов Владимир Николаевич Краснохолмский йоча искусство школышто ыштен, йоча-шамычым баян дене шокташ туныктен.

Тудо 1945 ий 25 июньышто Бирск олаште шочын. 1967 ийыште Стерлитамак оласе культпросвет училищым хор коллектив вуйлатыше специальность дене тунем лектын. Паша корныжым Калтаса селасе Культура пӧртыштӧ баянист лийын тӱҥалын. Тудын мурышо ансамбльже-влак Калтаса села, Нефтекамск, Уфа олаллаште эртыше тӱрлӧ конкурслаште участвоватленыт.

Уржа-сорла жапыште художественный самодеятельность коллектив-влак агитбригаде дене ферме ден пасулашке лектын коштыныт, пашаеҥ-влак ончылно концерт-влакым ончыктеныт. 1969 ий гыч Владимир Николаевич Краснохолмский селасе «Нефтяник» Культура пӧртыштӧ тыршаш тӱҥалын. Тыште чыла мурышо коллектив-влак Новоселов Владимир Николаевичын вуйлатымыж почеш вияҥыныт да пашам ыштеныт. Тиде – «Сударушка», «Гармония», паньым шоктышо «Холмичи» ансамбль. Лу ий мучко «Сударушка» ансамбль, тудо пашан ветеранже-влак гыч шога, селасе калыкым руш калык муро-влакым йоҥгалтарымыже дене куандара. «Гармония» ансамбльлан «Салют Победы» всероссийский фестивальыште участвоватлымыжлан «Калык ансамбль» лӱмым пуымо. Поселкышто культурно-массовый тӱрлӧ мероприятий-влак тудын деч посна эртаралтын огытыл. Тудо селасе музыкальный коллектив-влак дене тӱрлӧ мероприятийлаште чулымын участвоватла, паньым шоктышо ансамбль дене телевизионный программылаште сниматлалтеш.

Тӱрлӧ жапыште тудо кум школыштат пенийым туныктен, музыкальный руководитель лийын тыршен.

Краснохолмский селаште йоча музыка школым официально 1972 ийыште почыныт. Школым почмо икымше кечыж гычак В.Н. Новоселов йоча-влакым баян дене шокташ туныкташ тӱҥалын. Мый 1980 ий гыч тудын тунемшыже лийынам. Садлан тудым пеҥгыдын йодшо туныктышо, тыгодымак поро айдеме семын палем. Баян дене тудо мастарын шоктен да шке тунемшыже-влакымат тыгак туныкташ тыршен. Владимир Николаевич 100 утла выпускникым луктын, нунын кокла гыч шукыжо музыкальный образованийым умбакыже шуеныт да культура ден искусство сферыште туныктышо да вуйлатыше лийыныт. Тиде – В.С. Скрипкин, Р.И. Вагапов, С.М. Шамиданов, И.К. Попова, Р.Х. Гизатуллин, Э.Р. Кадырова. Лач тидыже туныктышын сеҥымашыже, мастарлыкше да профессионализмже нерген ойла.

Туныктышемлан кугу таум каласыме да тудым юбилейже дене саламлымем шуэш. Мемнан коллективна тудлан пеҥгыде тазалыкым, кужу ӱмырым, пиалым да чыла сайым гына тыланен кодеш. Тендан талантда да мастарлыкда ончылно вуйнам савена.