Еҥ-влакын тазалыкышт верч илыш

24 июньышто мемнан районысо врач-стоматолог Гизяр Мидхатович Хисамовын шочмыжлан 60 ий темеш

Эше тидым палемдаш кӱлеш, тунеммыж годым Гизяр Мидхатович спорт дене кылым кучен: изирак капан пеҥгыде рвезе лийын. Мединститутын спорт командыштыже республике да Всероссийский кӱкшытлаште эртыше таҥасымашлаште шуко гана участвоватлен, СССР спорт мастер лӱмым налын, многоборье дене призыв деч ончыч да призыв деч вара БАССР-ын чемпионжо лийын да молат. Гизяр Хисамовын спортышто могай сеҥымашлашке шуымыжым шотленат пытараш ок лий. Тудо ече денат икымше разрядше уло, баскетболист, тыгак грамота ден призше ятыр.

Теве 1983 ий кеҥежым самырык рвезе распределений почеш Калтаса селасе рӱдӧ эмлымверыш толын. Тыште тудо идалык интернатурым эртен, вара тугак профессийже почеш, врач-стоматолог лийын пашам ыштен. Ий гыч ийыш жап пашаште эртен, кеч тудыжо куштылгак лийын огыл гынат. Гизяр Мидхатович тыге мемнан Калтаса селаште илаш кодын, ешым чумырен, икшыве-влак шочыныт (а нунышт кумытын улыт). Эше илыме вер нерген шоналташ жап шуын. «Народная стройка» программе почеш кугу пӧртым чоҥеныт.

Вара перестройко, реорганизаций ий-влак толыныт. Кеч Гизяр Мидхатовичым районышто стоматологий пӧлкам вуйлаташ шогалтеныт (пел ставкылан) гынат, чыла тиде тудлан келшен огыл, тичмаш вий дене пашам ыштымыже шуын. Шуко шонкалыме деч вара паша гыч каяш да шкенжын врачебный пашажым почаш лийын. Тыге тудо 2003 ийыште ыштен. А вара «Хисамов» ООО-ым почмо дене сомыл тӱҥалын. Тыште кугу тӱткышым ойырыман, вет медицине учреждений почылтеш. Сандене кадр, пӧлем, оборудований-влак деке пеҥгыде йодмаш лийын. Пытартышыже миллион теҥгеш шуын, а вет тудыжо пашаште моткоч кӱлешан. Вет келшыше оборудований деч врачын ончыктымо услугын качествыже шога. Эше тидым палемдаш кӱлеш, пациентше-влак тудын ятыр. Клиникын коридорыштыжо кеч-кунамат черет. Туге гынат еҥ-влаклан кужу жап вучаш ок перне, тудо иканаште икмыняр клиентым обслуживатла. Тыште тудлан уста медшӱжар Ирина полша. Сандене тудо кеч-могай кечын, каныш да пайрем кечылаштат пашам ышта. Тудын нерген калык лач порын гына ойла. Эше тидым палемдаш кӱлеш, тудо приютлан, мусульман шӱгарлан, спортсмен-влаклан полша.

Жап кайык семын писын чоҥештен эрта. Теве пагалыме доктор Гизяр Мидхатовичлан 60 ий темеш. Туге гынат тудо тугаяк чулым, вий-куатан, да шке пашажым вияҥдаш планже ятыр.

Гизяр Хисамовлан пеҥгыде тазалыкым, илышыштыже пиалым, а пашаштыже у сеҥымашлашке шуаш тыланена.