Тазалыкым аралымаште 50 ий

Уткина Люза Сафиевна Калтаса селасе райрӱдӧ эмлымверыште 50 ий утла медшӱжар лийын пашам ышта. Тудо шкеже Бирск олаште шочын да кугемын. Школым тунем пытарымеке, шуко шонкалыде, тудо кӧ лийын пашам ышташ тӱҥалмыжым ончычак пален, медициныш тунемаш пурен. Бирск оласе медицине училищыште шинчымашым поген да тӱрыс корным ойырен налмыжым эше ик гана пеҥгыдемден. 1970 ийыште, тунем пытарыме деч вара тудым Краснохолмский участковый эмлымверыш медшӱжар лийын пашам ышташ колтат. Тыште 32 ий старший медшӱжар лийын пашам ыштен, шке мастарлыкшым, моштымышыжым да профессийыжым сай палымыжым ончыктен.

Люза Сафиевна – профессиональ медшӱжар, чытышан, мутланышан, поро кумылан, чаманышан, неле ситуацийыште йӧным муын моштышан улеш.

Оптимизаций тӱҥалме деч вара, кунам эмлымверыште пӧлкам петыреныт, Люза Сафиевна стерилизационный пӧлкан медшӱжаржылан пашам ышташ толын, тыште кызытат тырша.

Юрий Георгиевич дене пырля Ирина ӱдырым шочыктеныт да ончен куштеныт. Тудо 3 №-ан Краснохолмский кыдалаш школышто йот йылмым туныктышо лийын пашам ышта. Кок уныкашт кушкыт.

Люза Сафиевна эре порын пелешта, еҥ-влак декат корным муын мошта, кажныжлан поро мутым муэш, каҥашым пуа. Ик гана веле огыл РФ да РБ-ын почетан грамотыжо-влак дене палемдалтын. Пашан ветеранже улеш. Эмлымверын общественный илышыштыже чолган участвоватла. Профкомышто ятыр ий тыршен, культмассовый секторын пашажлан вуйын шоген, казначей улеш.

50 ий ончыч тудо шке профессийжым йӧратен ойырен налын, черле-влаклан полшен, кушкын толшо тукымым туныктен. 50 ий ик эмлымверыште пашам ышта. 50 ий ик коллективыште тырша, пагалымаш дене пайдалана. 50 ий шӱм-чон шокшыжым, шыргыжмашыжым пӧлекла да 50 ий ты профессийым ойырен налмыжлан нимынярат огеш ӧкынӧ.

Люза Сафиевна, профессиональ паремда дене Тендам! Ме, пашам пырля ыштыме йолташет-влак, Тыланда пеҥгыде тазалыкым, пиалым, порылыкым да чыла сайым гына тыланена.