Калтаса районысо медпашаеҥ-влак шке профессиональ пайремышт деч ончыч наградым налыныт

Сандене мемнан районысо медицине пашаеҥ-влак пагалымашым сулен налыныт. Шке пашаштым йӧратымыштлан, черле-влакым кажне кечын эмлымыштлан, йӱд-влакым малде эртарымыштлан, черле-влак деке тӱткӧ улмыштлан кугу тау. Кажне ийын Российыште июньын кумшо рушарняжын Медицине пашаеҥын кечыжым палемдат. Тиде кечын ме медицине пашаеҥ-влакым чапландарена. Тиде пайремым республике вуйлатыше Р. Хабировын пунчалже почеш, 26 июньышко кусарыме. Коронавирус инфекций чыла вереат вашталтышым пуртен.

Пайрем деч ончыч ме Калтаса рӱдӧ эмлымверын тӱҥ врачше Равиль Винерович Зарипов дене вашлийна да кызытсе куштылго огыл жапыште мемнан медик-влакын пашашт нерген йодыштна.
– Тиде инфекций шарлымын икымше кечыж гычак мемнан районысо ик медицине пашаеҥат шке пашавержым коден ыш кай, – каласыш мыланна Р.В. Зарипов. – Чыланат – врач, медшӱжар, санитарке-влакат шке пашаверыштышт кодыч. Южиктыже шке пашавержым кок арня коден каен огыл. Коронавирус инфекций дене черланыше-влак дене пашам ыштеныт, тыгак мемнан районысо икмыняр медпашаеҥ Нефтекамск оласе инфекционный госпитальыште тыршен. Тиде – Гайнанова Динара Альфисовна, Калтаса эмлымверын поликлиникыжын медшӱжарже; Сташкова Анастасия Владимировна, Калтаса эмлымверын хирургий пӧлкажын медшӱжар анастезистше; Ишаева Карина Сергеевна, Краснохолмский эмлымверын паллиативный пӧлкан процедурный медшӱжарже. Теве кокымшо вахте тушто Калтаса эмлымверын реаниматологшо, врач-анастезиолог Муфазалов Салават Якупович тырша. Кажныжлан кугу тау.

Таче Калтаса эмлымверын коридорлаж дене эртышыла ме йырваш сай олмыктымо пашам шуктымым ужына, пластик тӧрза ден омса-влак, йырваш ару. Эмлымвер территорият тыгаяк – йырваш пеледыш. А вет тыгайыш чыла коллектив пашам тыршен ыштымыжлан кӧра шуымо.

Таче район здравоохранений системыште 42 врач тырша: Калтаса эмлымверыште – 28, Краснохолмский эмлымверыште – 12, Кӧтерем эмлымверыште – 2. Персоналын тӱҥ ужашыже кугу паша опытан улеш, южиктыжын икмыняр специальностьшо уло. Мемнан врач-влак коклаште «Заслуженный врач РБ» почетан лӱмым нумалше-влакат улыт. Тиде – Калтаса эмлымверын врач-терапевтше М. Р. Насибуллина ден Краснохолмский эмлымверын врач-хирургшо Х.А. Хабиров. Кум врачым «Отличник здравоохранения РБ» знак дене палемдыме. Кокла медицине пашаеҥ-влак коклаште вич «Отличник здравоохранения РБ» тырша. Шукштым Чап грамото ден РФ Тауштымаш серыш дене палемдыме.

Тачысе кечылан Калтаса ден Краснохолмский селаласе эмлымверлаште 86 койко-вер уло. Калтаса ден Краснохолмский, Кӧтерем селаласе эмлымверлаште дневной стационар-влак пашам ыштат. Районышто 31 фельдшер-акушер пункт уло. Эше 4 ФАП-ым чоҥат.

Районысо рӱдӧ эмлымверыште 16 специалист приниматла. Пытартыш ийлаште лечебно-диагностике базым саемден колтымаште кугу пашам шуктымо: рентгент, флюорографий, УЗИ-диагностике, эндоскопический, клинико-диагностический лабораторий кабинет-влакым ыштыме. Тыште профессиональный, шке пашаштым сай палыше лаборант-влак тыршат.

Тений врач-влак радамыш самырык специалист-влак ешаралтыныт. Калтаса рӱдӧ эмлымверыш врач-терапевт Анастасия Сергеевна Иванова, врач-травматолог Динар Гизярович Хисамов, толыныт. Динар Гизярович эше тӱҥ врачын эмлыме паша шотышто алмаштышыже улеш. Мемнан деке тыгак самырык хирург Азамат Камилевич Хакимов толын. Краснохолмский эмлымверын коллективышкыже врач-терапевт Регина Дмитриевна Шартдинова ешаралтын.

Тыгак врач-влак дене иктӧр медшӱжар-влак тыршат.

– Пашам пырля ыштыме йолташем-влак шке пашаштым сайын шуктат, иктаж-кӧжым ойырен каласен ом керт, – ойла Калтаса эмлымверын тӱҥ медшӱжарже Фагиля Гависовна Насибуллина. – Нуно эре шке постыштышт улыт, шке пашаштым сайын шуктат. Шуко ий, кажне кечын йӱдшӧ-кечыже шке медицине вахтыштым шуктен шогат.

Шкеже Фагиля Гависовна нылле ий утла тыште тырша. Коло ий гына тӱҥ медшӱжар улеш.

Профессиональный пайрем вашеш да пашам тыршен ыштымыштлан районысо здравоохранений пашаеҥ-влакым награде дене палемденыт. Тиде район администраций дечат, тыгак региональный да федеральный награде-влак.

Тений «Отличник здравоохранения РБ» оҥеш пижыктыме знак дене терапий пӧлкан да дневной стационарын медшӱжарже Эльвира Михайловна Байдугановнам палемдыме. 1999 ий гыч тудо мемнан эмлымверыште тырша. Шке пашажым сай палыше, общественник, сай организатор – тыгерак ойлат коллективыште тудын нерген. БР Чап грамото дене Краснохолмский эмлымверын врач-терапевтше Галлия Шамиевна Ахметгалиевам палемдыме. Теве ынде шым ий тудо селасе да воктен верланысе ялласе еҥ-влакын тазалыкыштым аралымаште тырша. Тыгаяк наградым Калтаса эмлымверын бактериологический лаборант Римма Имаевна Зайгина налын. Лач тудо, противочумный костюмым чиен, коронавируслан анализым налеш. Тудо ятыр ий тиде пашаште тырша.

Республике грамото дене Краснохолмский эмлымверын дневной стационаржын медшӱжарже Манаева Маргарита Ефимовнам, БР Тауштымаш серыш дене Краснохолмский эмлымверын педиатрий участкын участковый медшӱжарже Тимиряева Лиана Алексеевнам, тиде эмлымверынак физкабинетын медшӱжарже Эльвира Дмитриевна Шариповам, РФ Тауштымаш серыш дене физиотерапий кабинетын медшӱжарже Мустафина Наталья Гавриловнам палемдыме. Ятыр ий тудо тудо Калтаса эмлымверын участковый медшӱжарже лийын тыршен. Тудын чумыр паша стажше 38 ий.