Самырык врач-влаклан корным

Калтаса рӱдӧ эмлымверын поликлиникыжын 28-ше кабинетыштыже черле еҥ-влакым самырык врач-терапевт Иванова Анастасия приниматла.

Эше 1 №-ан Калтаса кыдалаш школын 8-ше классыште тунеммыж годымак тудо врач лияш шонен. Школым тунем лекмыж деч вара документше-влакым вигак Башкир кугыжаныш медицине университетын «Лечебное дело» факультетышкыже пуэн. Куд ий тунемме жапыште чылажат лийын. Кузе шкеже Анастасия Сергеевна ойла, тунемаш куштылго лийын огыл, туге гынат, оҥай. Студентке годым практикым район эмлымверыште эртен, сандене тыште тудлан чыла палыме: медперсоналат, тыгак пациент-влакат.

– Палем, мемнан районысо эмлымверыште специалист-влак огыт сите, сандене шуко шоныде, мый шке паша корнемым шке селаштем тӱҥалаш лийым, – ойла Анастасия Иванова. – Родо-шочем-влакат тидын дене келшышт.

Кунам тудо пашам тӱҥалын, Кирилл эргыжлан улыжат кум тылзе веле лийын. Туге гынат, тудо пашашке лектын. Ынде теве пел ий Калтаса эмлымверын моло терапевт-влак дене пырля тудо черле еҥ-влаклан полышым ончыкта.

– Мемнан ешыште медик-влак уке улыт, – ойла умбакыже самырык доктор. – Ачам, Сергей Александрович – водитель, авам, Анна Семеновна – бухгалтер. Таче гын мый ӱшанлын каласен кертам, медицине тиде – мыйын пашам. Медицине деч посна мый шкемым моло пашаште ом уж. Пациент-влакын куан чурийышытым да «Тау, доктор» шомакыштым колаш моткоч куанле. А вет шукерте огыл гына нуно чер деч орланен мый декем приемышко толыныт ыле.

Кажне кечын самырык врач деке приемыш коло утла еҥ толеш. Кажныжлан тӱткышым ойыраш да ойырен налме пашам йӧратымаш – лач тиде самырык специалистын пашаштыже эн тӱҥ лийын кодеш.