Икымше ончалтыш гыч ӱмырешлан

Краснохолмский села гыч Елизавета Ипаевна ден Валерий Тимирьянович Гильмутдиновмыт пел курым илыш корно дене пырля ошкылыт. Еш илышын шӧртньӧ юбилейыштым нуно палемденыт. Икымше вашлиймашыштым нуно кызытат шокшын шарналтат.

Елизавета Ипаевна Дӧртыльӧ районысо Чарлак ял гыч улеш, ты ялыштак Валерий Тимирьяновичын коваже илен, тышке тудо унала толын. Ты ялыште тудо самырык ӱдыр Елизаветам вашлийын. Ужын да икымше ончалтыш гыч йӧратен шынден. «Вет тудо мыланем вигак каласыш: шолыштам, – шыргыжалын шарналта Елизавета Ипаевна. – Шолыштын наҥгайыш вет». Йолташыж дене имне дене толыныт, вургемышкыже погоным пижыктен. «Милиционер улеш манын ондалаш тыршен», – воштылеш Елизавета Ипаевна. ӱдырын ачаж ден аваже шижынат ышт шукто, кузе ӱдырым Ваныш велыш – Валерийын шочмо ялышкыже наҥгайышт. Варажым сӱаным модыныт.

Кок еҥ арамлан огыл вашлиялтын, кок пелаш икте-весыштым муыныт, ик ешыш савырненыт, тыште вич икшыве – кум эрге да кок ӱдыр шочыныт. Кумло ий ончыч Краснохолмский нефтяникмыт поселкыш илаш кусненыт. Тыште 8 март уремыште пӧртым чоҥеныт, тыштак кызытат илат. Коча ден кова деке чӱчкыдын уныка-влак толыт, а нунышт – 8.

Пел курым пырля. Тиде шуко але шагал? – шӧртньӧ юбиляр-влаклан йодышыт пуэм.

– Жап шижде эртен кайыш. Ме еш илышым ий дене огына шотло, а илена. Шке тургыжланымашна, пашана, озанлыкна, икшыве-влакым йол ӱмбаке шогалтыман, вара уныка-влаклан полшыман лийын, – ойла Елизавета Ипаевна.

– Туге гынат, еш илышда нерген икмыняр мутым каласыза?

– Моло-влак гаяк, – пелештышт юбиляр-влак. – Тӱҥжӧ чытыман, икте-весылан полшыман да проститлен моштыман.

Тиде чапле мужырым район администраций вуйлатышын алмаштышыже Е.А. Алексеева да Калтаса районысо ЗАГС пӧлка вуйлатыше И.В. Валеева саламлышт. Нунылан Саламлымаш адрес ден республике вуйлатыше деч шарнымаш пӧлекым кучыктышт.

Нине поро еҥ-влак деч сай кумылым налын ме мӧҥгышкына тарванышна… ™шаныме шуэш, икмыняр ий гыч нуно угыч шке ешышт дене кугу пайрем ӱстел йыр погынат да сӱаным палемдат, ты гана – бриллиантовыйым.