«Мый эре противочумный костюмым чияш ямде улам…»

Рашид Давлитшавич Гимрановлан 70 ий

Рашид Давлитшавич районысо эмлымверын пашажым организоватен колтымашке ятыр вийжым пыштен. Документаций, районысо лечебно-профилактический учреждений-влак шотышто лицензий – чыла тидым Рашид Давлитшавич ыштен. 2006 ийыште район территорийыште «Здоровье» приоритетан национальный проектым илышыш шыҥдараш тӱҥалын. Тудын пашажым шотленат от пытаре.

2001 ий гыч ВИЧ-инфекций дене черле-влакым учетыш шогалта да нуным терга. Тыгак идалык ыштыме паша отчетымат тудо ышта. Тачат, кажне кечын, лу тӱрлӧ отчетым сдаватла.

Колективат, район калыкат тудым пагала. Грамотан, чытыше, тудын деке кеч-могай йодыш дене мияш лиеш, кажныжлан вашмутым пуа. Аттестацийлан ямдылалтме годым чылалан полша. Кугу йӱк дене, кычкырлен ойлымыжым мый нигунамат колын омыл.

Чыла компьютер программе дене пайдаланен мошта. Таза илыш-койышым намия, тамакым ок шупш, пеледышым ончен кушта. Кажне ийын, 9 майлан, эмлымверыш тюльпан-влакым конда.

Пашам тыршен ыштымыжлан эмлымвер, район администраций-влакын чап грамотышт дене палемдалтын. 1986 ийысе соцтаҥасымаште сеҥыше лийын, СССР здравоохранений министерствын чап грамотыжо, «Отличник здравоохранения Республики Башкортостан» оҥеш пижыктыме знак дене палемдыме.

Рашид Давлитшавич мемнан районысо здравоохранений вияҥмашке изи огыл надырым пыштен да кызытат тырша. А вет жап верыште ок шого, чыла вашталтеш. Тудо ойла: «Мо гыч тӱҥалынам, тушкак толынам. Тиде организационный кугу паша. Ончыч ме бактерий-влак ваштареш кучедалынна гын, кызыт вирус ваштареш кучедалына». Кызыт тудо коронавирус инфекций дене кучедалмаште передовойышто улеш.

Юбилей пайремже дене ме тудым саламлена да пеҥгыде тазалыкым, пашаштыже сеҥымашым гына тыланен кодына.