Директор тудын призванийже

Пашам ыштыме жапыште шӱдӧ дене тунемше-влаклан келге шинчымашым пуаш мыняр йӧратымаш, вий, порылык, шинчымаш да тыршымаш кӱлын. Тудо эре иктаж-мом уым кычалеш. Ме, пашам пырля ыштыме йолташыже-влак, тудын дене кугешнена.

Лидия Михайловнан чын туныктышо лияш чылажат уло: талант, шӱм-чон шокшылык, тӱс чеверлык, уш, чытымаш да тыршымаш, пытыдыме энергий. Школышто тудо коло ик ий тырша, биологий ден химийым туныкта.

Павасола кыдалаш школын коллектившылан Лидия Михайловна эн ончыч, конешне, директор улеш. Тиде пашаште тудо 19 ий тырша. «Школ директор – уста капитан», тудо кугу корабльын рульжо воктен шога, тудын деке ӱшан дене туныктышо, тунемше да нунын ача-авашт ончат. Тудо нимогай вашталтыш деч огеш лӱд, кеч-могай ситуацийыштат кӱлеш пунчалым муын кертеш. Ме тудлан ӱшанена, лач тыгай айдеме мыланна кӱлеш. Тыгай айдеме мыланна – Лидия Михайловна.

Тудо мемнан коллективнан туныктышо-влакын чулымлыкыштым мастарын почын мошта, вара нунышт ончыкыжым пагалыме еҥыш, туныктышыш савырнат. Тудо пашам пырля ыштыме йолташыже-влакын сеҥымашыштлан куана. Уло пашам тудо лийжак манын ышта.

Мемнан школ коллектив пашам тыршен да чумырген ыштыше улеш. Тидын нерген кажне ийын школым у тунемме ийлан ямдылыме годым икымше вер-влакым налмаш, Россий мучко эртыше «100 лучших школ» конкурсышто сеҥымаш ойлат. Школым лу утла тунемше ший медаль дене тунем пытарен, а тений 14 выпускник гыч кумытшо отличий дене аттестатым налын. Мемнан тунемшына-влак тӱрлӧ олимпиаде, конкурслаште участвоватлат да сеҥат.

Тудын моштен вуйлатымыж почеш школ ила, тӱзлана да пеледеш. Коллектив ден тунемше-влак школ пеленысе участкыште пашам ыштат. Школ капкам почат да ӧрат…йырымваш чыла сылне: тӱрлӧ фигуро, тӱрлӧ пеледыш дене ӧрыктарыше клумбо-влак. А кунам школ кӧргыш пурет, тыште тӱрлӧ пеледыш шинчам куандара. Чыла вере ару да сӧрал. Лидия Михайловна чыла тиде пашам организоватла гына огыл, тыгак чыла тидым шукта.

Лидия Михайловна районыштат пагалыме еҥ улеш. А ме, пашам пырля ыштыме йоллташда, тунемше-влак, Тендам моткоч йӧратена да Тендан дене кугешнена, пашам пырля ыштымыланна куанен илена. Таза да пиалан лиза, Лидия Михайловна.

Ончыкыжымат мемнам лач сеҥымаш-влак гына вучаш тӱҥалт манын ӱшанен кодына.