Уло тыгай паша – еҥ-влаклан полшаш

Краснохолмский села гыч Светлана Александровна Алексеева ятыр ий социальный пашаеҥ лийын тырша

Тиде сферыште тӱҥ шотышто ӱдырамаш-влак пашам ыштат, тыглай еҥ тыште пашам ыштен ок керт, тыште лач профессионал-влак веле тыршат.

Мемнан районыштат социальный пашаеҥ-влак улыт. Краснохолмский селаште пашам тыршен ыштымыштлан да тӱткӧ улмыштлан нуным пагалат. Икмынярыжым поснак палемдыме шуэш. Мемнан селаште изирак капан, каура ӱдырамаш Светлана Александровна Алексеева ила. 2066 ий гыч социальный пашаеҥ лийын тырша. Ме, тудын подопечныйже-влак, тудын полышыжлан куанен огына шукто.

Светлана Александровна 70-80-90 ияш еҥ-влаклан полышым ончыкта. Тудо нунын деке арнялан кок-кум гана мия, кӱлеш гын шукыракат.

8 шагат эр гыч Светлана Александровна йол ӱмбалне улеш, шке подопечныйже-влак деке вашка: кевытыште кочкышым, аптекыште эм-влакым налеш да конда, счет-влакым тӱла, пӧрт кӧргым эрыкта, тӧрза-влакым мушкеш. Шыжым да шошым посна пӧртыштӧ оралте-влакым эрыкта, пакчаште полша: пакчасаскам шында, вӱдым шава, шӱкым эрыкта, пакчасаскам пога.

Кӧлан эмлымверыш кӱлеш – наҥгая. Кӱлеш гын, документ-влакым оформитлаш полша. Тудын пашажым шотлен пытарашат ок лий.

Тидын годым тудо эре весела, поро улеш. Нигунамат еҥ-влак дене торжан, кугу йӱк дене ок кутыро. Ме тыгай социальный пашаеҥна дене куанен огына шукто. Ме тудым шкенан шочыланна шотлена. Тудо мыланна мо кӱлешым пала, ушан каҥашым пуа.

Илалаше еҥ-влак дене пашам ышташ куштылго огыл. Мыняр еҥ, тунар койыш. Ме туге чот Светлана Александровна деке тунем шуынна, кунам тудо канаш але больничныйыш кая, мыланна моткоч йокрок чучеш.

Социальный пашаеҥын пашаже моткоч кӱлешан, тудым врач ден туныктышо радамыш шогалташ лиеш. Нуно тӱҥ шотышто илалше ден инвалид-влак дене пашам ыштат. Жал, конешне, нунын неле пашаштлан пашадарым шагал тӱлат. Нунылан мланде марте вуйнам савена. Илалше еҥ ден инвалид-влак социальный пашаеҥ-влак деч посна кузе илат ыле?

Селасе моло соцпашаеҥ-влакланат таум каласыме шуэш, поснак Машида Хасановалан.

Мемнан шерге полышкалышына-влаклан пеҥгыде тазалыкым, еш пиалым тыланен кодына.

Фотосуретыште: Светлана Александровна Алексеева.