Калтаса ужара
+18 °С
Пылан
Все новости
Новости
22 Сӱрем 2020, 11:00

Ужар тургымын геройжо-влак

Артем Ильбарисов ден Александр Кутлубаев шке илышыштым ялозанлык дене кылденыт

Артем Ильбарисов ден Александр Кутлубаев шке илышыштым ялозанлык дене кылденыт
Районысо озанлыклаште кургым ямдылыме жап мучашке лишемеш. Игече моткоч шокшо гынат, ял калык шудо ден сенажым ситышын ямдылен. Ушкал-влаклан телылан тутло курго сита. Тыште, конешне, озанлыкыште тыршыше механизатор ден водитель-влакын надырышт кугу.
«Заря» ялозанлык кооперативын механизаторжо Артем Ильбарисов тений шочмо Актыган ялыштыже гына тыршен огыл, тыгак районысо моло озанлык-влаклан сенажым ямдылаш полшен. Тудо силосым погышо КСК-100 комбайн дене шудым солен, тыгыдемден. Тӱҥ шотышто тудо Назаров, Путилов, Захаровын кресаньык-фермер озанлыклаште тыршен. А тиде кечылаште ме тудым Ленин лӱмеш ялозанлык коопертивыште вашлийна. Пытартыш гектарлаште тудо люцернын ужар массым сенажлан поген.
Артем Ильбарисов – опытан механизатор. 1992 ий гыч тиде профессийыште тырша. Озанлыкыште тӱрлӧ маркан тракторлаште тыршен – гусеничный, колесан денат, комбайнымат вӱден. 28 ий жапыште чыла ялозанлык технике дене пашам ышташ тунемын. КСК-100 денат шке пашажым сай палыше мастер гай тырша.
Ильбарисов пашам йӧратыше еҥ веле огыл, тыгак моткоч сай еш оза улеш. Элиза ватыж дене кум йочам ончен кугемденыт. Эргышт-влак шукертак кугемыныт, шке пашам ыштат, Диана ӱдырышт Актыган школышто кандашымше классыште тунемеш. Посна сурт озанлыкым кучат – кугу пакча, шуко вольык. Ялыште вет тидын деч посна нигузе ок лий.
Александр Кутлубаев Ленин лӱмеш ялозанлык кооперативыште водитель лийын тырша. Ильбарисов семынак, школ деч вара вигак колхозышто тырашаш тӱҥалын. Тӧлдӧ кыдалаш школым тунем пытарымеке, военкомат гоч шоферлан тунем лектын да 1982 ий август гыч Ленин лӱмеш колхозышто пашам тӱҥалын. Тидлан кумло кандаш ий эртен. Ик жапыште Тӧлдыштӧ «Мир» колхозат лийын, вара адакат Ленин лӱмеш, ынде тыгаяк лӱман ялозанлык кооператив. Александр ӧрдышкӧ сай илышым кычал каен огыл, ойырен налме шке пашажлан ӱшанле лийын кодын. Кызыт тудо Ильбарисов дене пырля сенажым ямдылымаште тырша. Ужар массым пасу гыч фермышке шупшыкта.
Ильбарисов, Кутлубаев нергенат лач иктым гына каласаш лиеш – кушто шочыныт, тушанак кодыныт, шочмо мландыштышт пашам ыштат, икшыве-шамычым куштат. Александр Ирина ватыж дене шым йочам ончен куштеныт. Кугырак эргышт-влак иктыже Йӱдвелыште тырша, весыже армийыште служитла. Эдита ӱдыржат пашам ышта. Эн изи Женялан 10 ий, тудо 1 №-ан Калтаса КШ-ын визымше классыште тунемеш. Келшен илыше шуко икшыван ешыште йоча-шамыч пашам йӧратыше кушкыт, примерым нуно ача-авашт деч налыт.
Ю. Шамсутдинов.