Йӧратыме, шочмо-кушмо кундемна

Тиде лагерьын пашаж нерген мыланна тудын вуйлатышыже Наталья Александровна Корнева каласкалыш: – Тений коронавирус эпидемийлан кӧра кеҥежымсе йоча лагерьын пашаже вашталтын. Йӱлашкак пурышо форма-влак деч кораҥаш логалын. Мемнан краеведений лагерьлан программым ямдылышыла, ме йоча-влаклан оҥай да пайдале материалым ямдылаш тыршенна.

Шочмо кундем нерген викторине эртен, «Восход» ялозанлык кооперативыш, районысо историй да краеведний музейыш экскурсий дене миенна, тушто мыланна тудын вуйлатышыже Шакиртов Роберт Шарафович Калтаса район нерген шуко оҥайым каласкален.

Конешне, тӱрлӧ мероприятий кокла гыч икшыве-шамычлан эн чот поход келшен. Ме нунын дене Калтаса гыч Надеждиныш кайышна. Султанай ялысе памашыш пуралт лекна. Кокымшо гана карьерыште чарналтышна. Моткоч сӧрал вер. Карьерым разрабатыватлымылан кӧра, кузе пӱртӱслан эҥгек ышталтмым йоча-шамыч шке шинчашт дене ужыч. Тыште, лакылаште йӱр вӱд темын шинчын да изи ерыш савырнен.

Надеждин ял воктенысе кӱварыште йоча-влак умдыр (бобр) пӱялыме плотиным ужыч.

Конешне, ме «Надеждино» каныме базыште лийынна. Тыште ме каналташ шична да Танып эҥерым ончышна. Ошман серышке волышна да тушто коштын савырнышна. Ончыч тыште переправе лийын, калык ик сер гыч вес серыш тудын гоч коштын. Поп курыкыш кӱзышна. Ончыч тыште чоҥымо материалым – алибастерым – луктыныт.

Поход чылалан пеш келшыш, тудо оҥай гына огыл, тыгак пайдале ыле. Вет шуко икшыве ты велне икымше гана лийын.