Ачаж ден аважын чапле эргыже

Армийыш служитлаш кайымыже нерген вучыдымо увер лийын огыл. Тудлан Владимир ончылгочак ямдылалтын. Изинекак спорт дене кылым кучен. Моло рвезе-влак гаяк Ӱлыл Качмаш школышто тунеммыж годым ече дене таҥасен да куштылго атлетике дене марафонлаште участвоватлен.

В. Шакриев кумыл дене служитлаш каен. Тудын ончылно сай пример-влак лийыныт – Владимирын кугурак изашт-влак Виктор ден Вадим шке порысыштым шочмо-кушмо эллан пуэныт. Владимир распределений почеш Хабаровский крайыш логалын.

Самырык салтак армийыште дисциплинылан, кече режимлан, кочкышлан вашке тунем шуын. Пеҥгыде рвезылан ик ий шижде эртен каен. Тудо армийысе илышым умылен толын, шукылан тунемын. Частьын командованийже тудын сеҥымашыжым, тыршымыжым ужын ача-авалан таум каласыман серышым колтен. Шке куанышт дене нуно мемнан дене пайлалтыч: «Пагалыме Валерий Дмитриевич ден Эвелина Александровна. 46102 войсковой частьын командованийже Тыланда увертара, Тендан эргыда, рядовой Шакриев Владимир Валерьевич шке воинский порысшым, ача-аван шӱден пуымо мутшым чап дене шукта – шочмо-кушмо элым арала.

Служитлыме жапыште тудо шкенжым чытышан, дисциплинированный, пеҥгыде салтак семын ончыктен, шке воинский специальностьыштыжо мастер лийын. Тудын сеҥымашыж дене подразделенийын чыла личный составше кугешна да Тыланда, тыгай чапле эргым ончен куштымыланда шӱм гыч лекше таум каласа.

Тыланда пеҥгыде тазалыкым, улан илышым да пашаштыда сеҥымашым тыланена».