Фотосӱрет кӧн нерген ойлен

6 сентябрь – Нефть да газ промышленностьын пашаеҥже-влакын кечышт

Ты кечылаште редакцийыш Краснохолмский селаште илыше еҥ, педагогика пашан ветеранже Валентина Ивановна Бурдина йыҥгыртен. Тудо фотосӱретым колтен, тушто тудын пелашыже Николай Андреевич Бурдин да Краснохолмскийысе пролымо паша управленийыште пашам пырля ыштыме йолташыже-влак дене пырля войзалтын.

Николай Андреевичын паша биографийже Надеждинысе нефть фонтан гыч тӱҥалын. Тунам тудо Надеждин ялыште икмыше гана почмо скажиныште пролышо лийын пашам ышташ тӱҥалын. Пролымаште 30 ий утла тыршен. Сулен налме канышыш лекме деч варат «нефтянке» дене ойырлен огыл. Кузе Валентина Ивановна умыландарыш, ты жапыште Краснохолмский УБР пелен тунемме комбинат лийын. Тыште самырык пролышо-влакын квалификацийыштым кӱкшемдыме шотышто кадр-влакым ямдыленыт. Тыште Николай Адреевич туныктышо лийын тыршен.

А тиде снимкым тунемме буровой установко воктене ыштыме. Бурдин Николай Адреевич пурлаште шога. Тудын воктене кумдан палыме нефтяник, тудын пашажым орден да медаль-влак дене палемдыме, СССР Кужаныш премийын лауреатше Иван Тимофеевич Серегин. Шолаште краснохолмскийсе эше ик легендарный нефтяник, пролымо шотышто мастер, Социалистический пашан геройжо Фануз Фаизович Фаизов. Тудын воктене, кӱшнырак Марат Гависович Шайдуллин – Башкирийын йӱдвел-касвелыштыже нефть улман верым шымлыме пашан организаторжо да участникше, 1970 гыч 1995 ий марте пролымо пашан Краснохолмскийысе управленийжым вуйлатен.

А теве эше кок пӧръеҥын лӱмыштым Валентина Ивановна каласен ыш керт. Краснохолмский селаште илыше еҥ-влак ала палат, нунын нерген каласкален кертыда. Ты фотосӱретым савыктыме годым, нуным те пален налыда манын ӱшанена.