Изи пеледыш (ойлымаш)

А изи пеледыш йолташыже-шамычын вуйыштым веле ужеш. Тудлан гӱжлен шогышо чодырам, курыкым, мӱндырнат огыл верланыше пӧрт-влакым ужаш пӱралтын огыл. Нарынче шыже марте илен шукта гын, пеш йӧра ыле. Тудынат вет илымыже шуэш. Кеч яндар кавам, йошкар шокшо ласка кечым ужын куана. Кайык-влакын йӱкыштым колеш. Южгунам тудын ӱмбаке мотор лыве шинчеш, изиш каналта.

Илаш лиеш ыле, но икана айдемын ошкыл толмыжо тымык эрым шергылтарыш. Изи пеледыш трук шып лие. Вуйжым кавашке нӧлтале, изи пеледышым ӱмылка петырыш. Теве кугу йолчиеман айдеме воктеныже чарнен шогале. Шучко айдеме, кугу кидкопажым саҥгашкыже тушкалтен, кужу жап йырваш ончышто, тыҥге-туҥге тошкышташ тӱҥале. Саде еҥет мӧҥгеш пӧртыльӧ да изи пеледышым чаманыде тошкале.

Ик жап йырваш тымык лие. Уэш кугу ката нӧлталте, эмганыше пеледыш эрыкышке лекте. Но молан тудым мландышке темдальыч? Изи пеледыш ужын кодо: саде айдемет пеш спай вургеман. Шышталге ӱпшым шола гыч пурлашке пеш чаткан шерын шынден. Кужу, мотор капкылан, путыракат мотор. Йолчиемже кече деч чот йылгыжеш. Лач сур шинчаже гына осалын тышке да тушко ончыштеш. «Тиде еҥын шӱм-чонжат поро огыл дыр?» — шоналтыш изи пеледыш.

Йырваш уэш ончале. Э-э, тиде кугу капан еҥ тудым веле огыл сусыртен улмаш! Теве воктеныже алын волгалтше шагат пеледыш-влак рат дене мландыште кият. Нунылан чотак логалын. Мыйже эше чытем, чыташ шочынам. Кузерак изи пошкудем-влаклан полшышаш? Тудо тарванаш тыршыш, керте вет. Эркын-эркын вуйжым нӧлтале. Воктенысе кияк шудышко эҥертыш, йошкар кечым ужо, ласкан шӱлалтыш.

«Ынде кынелам, ынде шогалам. Мландыште кийыше ал пеледыш-шамычланат полшен кертам», — шке семынже вудымата изи пеледыш.

Теве ласка мардеж пуале, шыве-шыве леве йӱр йӱрын кайыш. Пеледыш-влак чыланат мланде гыч нӧлталалтыч. Илышлан куанен, йошкар шокшо кече ваштареш вуйыштым савалтышт.