Шошылан вуем савем (ойлымаш)

Пӧрт воктене, пакчаште, пасулаште кийыше сур тӱсан лум эркын леваш тӱҥале да коремла дене шурген йоген кайыш. Йырваш — шошо шӱлыш. Мланде топланыш, а тудын ӱмбалне ужар шудо нерешташ вашка. Пушеҥгат почеш ок код, изи полдыш гай лышташым луктеш. Тушко изи кайык толеш, шошо кече ваштареш шулдыржым рӱзен муралтен колта. Тыште да тушто вольык йӱк шокта. Нуно уремышке, олыкышко лекташ вашкат. Южгунам озавате вурседылеш. Ял ӱмбалне йӱк-йӱан талышна. Икманаш, луман, поранан, шыде мардежан теле эртыме шижалтеш. Мландымбаке сылне шошо пӧртылеш. Кӧгӧрчен курык шеҥгечын лекше йошкар кече утыр да утыр ырыкта. Телым пылвомыш гыч йогыланен ончымыжлан изишак вожылеш. Мландын, калыкын, кайыквусын, пушеҥгын кылмыше шӱмыштым ырыкташ вашка.

Сурт оза пакчашке мӱкш омарта-влакым луктедыл шында. Киерожыш ончыштеш. Пӧрт оза-влакын чоҥештен лекмыштым вуча. Йол йымалне ночко гынат, кӱнчалтен, пеледыш нӧшмым шола. Таче-эрла мотор пеледыш лектеш, изи мӱкшлан мӱйым погаш, шинчын каналташ вер лиеш.

Сылне жап пӧртыльӧ. Ломбо, олмапу, сирень пеледыт. Йырваш вуйым аҥыртарыше тамле пуш шарла. Шошым тӱня помыжалтеш, шошым чыла сай паша шукталтеш. Ял калык пасушко лектеш, мландым куралеш, тырмала, тушан пырчым ӱда, кинде шочеш. Шокшо кечеш, леве йӱреш лӧзаҥын кушкеш, шыркам колта, пырчым пога. Адакат илыш ончыко кая. Манамыс, чылажат шошо жапыште тӱҥалеш. Тымык кастене ӱдыр-каче вашлиймаш, келшымаш лиеда. Шыже жаплан киндым, пакча емыжым поген налмеке, южиктыже сӱанымат тарвата.

А кызыт шошо! Мландымбалне илыше чонан-влакын йывыртыме жапышт. Сылне шошо! Тый ик ийлан ик гана веле толат! Ик гана веле шӱм-чоным тарватет! Эртыше самырык жапым, пылышлан солнышо гармонь йӱкым, йӧратыме таҥна дене памаш воктеке волымынам, эркын куэрла дене ошкылмынам, агытан мурымеш, волгыжтӱр коймеш ойырлен кертде капка воктене шогылтмынам шарныктет.

Садлан уэш пӧртылшӧ сылне шошылан, йошкар кечылан, ош тӱняште илымемлан таум ыштен, вуем савалтем.