1 №-ан Краснохолмский КШ-ын 2020 ийысе выпускникше-влак

Нигӧ ӱчашаш ок тӱҥал дыр, кеч-могай школын шӱргыжӧ – тудын выпускникше-влак. Эртыше ийын 1 №-ан Краснохолмский КШ-ым 26 ӱдыр ден рвезе тунем лектын.

Ты тунемме ий мемнан выпускникна-влаклан неле лийын, нуно поснак шыгыремдыме условийыште, дистанционно тунемыныт. Туге гынат тиде экзаменлан ямдылалташ нимынярат мешаен огыл. 9-ше классым тунем пытарыме деч вара ты тунемше-влакым кок тӱшкалан шеледеныт: физико-математический да социально-гуманитарныйлан.

Кок ий нуно ойырен налме предметыштым тунемыныт. Ӱдыр ден эрге-влак ЕГЭ-лан веле огыл ямдылалтыныт, тыгак тӱрлӧ конкурс ден конференцийлаште участвоватленыт. Тыгеракын, Д. Юнусова ден Р. Зиятдинова УГНТУ пелен шымлыме паша конкурсышто призер лийыныт; А. Матзянова, Д. Юнусова, Р. Зиятдинова, А. Тимергалиева, Д. Зайнетдинова, Л. Адиева, М. Тахавиева сайлымаш деч ончыч президентский программым араленыт, Санкт-Петербург олаште эртыше всероссийский конкурсышто кумло эн сай командыш пуреныт; А. Салихова, А. Матзянова, Д. Коновалова, Д. Юнусова, Я. Янгильдина «Артек» ден «Орленок» МДЦ-ште ик гана веле огыл лийыныт; К. Тимирбаев, М. Шартдинов, Д. Давлетов, К. Минабашев – мемнан школнан спорт элитыже; Т. Шангараева, Д. Сакриева, С. Тимирзянов – школ илышыште чолгаеҥ-влак. Нимолан ӧраш, нуно чыланат ЕГЭ-м сай сдатленыт да тыланыме тунемме заведенийлаште шинчымашым погат.

УГНТУ-што Э. Вильданова, М. Шартдинов, Д. Мухаметов, Д. Юнусова тунемыт. Санкт-Петербургын кумдан палыме вузлаштыже А. Матзянова ден Л. Адиева шинчымашым погат. Казаньысе КНИТУ-ыш Р. Шаймурзина ден Д. Коновалова пуреныт, а КФУ Ахмадуллина Айгуль ончылно омсажым почын.

Ю. Глухова, А. Мусякова, А. Тимергалиева, А. Хасанова, Н. Гафутдинов, Л. Лутфуллин БГУ-ын студентше улыт, М. Тахавиева – Нижневартовский ГУ-што тунемеш, а Д. Зайнетдинова – УДГУ-што. Южик тунемше республикын да тудын деч ӧрдыштӧ эн сай колледжшым ойырен налын. Рвезе-влак ЕГЭ дене кӱкшӧ баллым поген шке шонымашыштым шуктеныт.

А. Матзянова (руш йылме дене 98 балл да математика дене 80 балл), А. Ахмадуллина (руш йылме дене 91 балл), Э. Вильданова (руш йылме дене 87, математика дене 80, информатика дене 79 балл), Юнусова Дилара (руш йылме дене 85 балл), Мухаметов Д. (физика дене 85 балл), Л. Адиева (историй дене 83, обществознаний дене 69 балл), М. Тахавиева (географий дене 83 балл), М. Шартдинов (математика да руш йылме дене 82 балл) сай результат-влакым ончыктеныт.

Кӱкшӧ балл-влак – тиде тыршен пашам ыштыше туныктышо-влакынат результатышт. Школ тыгак чыла ача-авалан, поснак Гользира Рафкатовна Юнусова да Танзиля Насифуллиновна Шаймурзиналан кугу таум ойла, нуно 11 ий школын илышыж дене иленыт, манын каласаш лиеш.

Пагалыме ӱдыр ден эрге-влак! Илышыштыда ик эн кӱлешан этапшым мучашлыме дене саламлена. Школ гыч те кугу да келге шинчымашым, шарнымашым да пеҥгыде кылым наҥгаенда. Тек тендан кумда кугу корныш лекмыда ояр да пайдале лийже. Эн тӱҥжӧ – пиалан лийза да шарныза: школышто тендам эре вучат.