Калыкын тазалыкшым арала

Шке пашаштым йӧратыше да тудым уло кумылын шуктышо шагал огыл еҥ Кӧкыш ялыште ила.

Тиде категорийышке мемнан фельдшерна Шаяхметова Наталья Семеновнат пура. Тудо 20 сентябрьыште шкенжын 60 ияш юбилейжым палемден.

Наталья Семеновна 40 ий йӧратыме пашажым шукта – калыклан медицине полышым ончыкта.

Вет ялыште илыше кажне еҥ кунам гынат тудын деке полышым йодын толын. Кажныжлан тудо поро мутым, кӱлеш каҥашым муэш да полша.

Пашаже тудын моткоч шуко – черле-влакым приниматла, пӧртышкӧ ӱжыктат гын ­- кая, капельницым шында, уколым ышта, давленийым виса, профилактике пашам эртара – чылашкыжат етшаш тырша. Ни жапым, ни каныш кечым, ни отпускым шотыш ок нал – кеч-кунамат черлылан полшаш ямде.

Пашам тыршен ыштымыжлан тудлан ялсовет, район администраций вуйлатыше, здравоохранений министерстве, «Единая Россия» партий деч Чап грамот-влакым кучыктеныт.

Наталья Семеновна чыла моторлыкым акла. Тудын паша верыштыжат, пӧртыштыжат мотор да сылне. Чыла вере ару, шинчам сӧрал пеледыш-влак куандарат.

Шке пашаж деч посна тудо мер пашамат шукта: ийготыш шудымо икшыве-влак шотышто комиссийын членже, ялсоветын депутатше улеш, ялыште эртарыме чыла мероприятийлаште участвоватла. Икманаш, моткоч сай озавате, грамотный специалист улеш.

Пагалыме Наталья Семеновна, Тендам юбилейда дене саламлена. Уло кумылын тыланена пеҥгыде тазалыкым, ойырен налме корныштыда сай паша саскам, волгыдо да куанле илышым, чон ласкалыкым да еш пиалым.

Тендан пациентда-влак.